Compendio biblico in lingua genovese/Chì se contèm como quelli de Egito zem apresso a li figij d'Issael
 |
Questo testo è completo. | |
| ◄ | Chì se contèm como li figij d'Issael zem a stá in arenir | Chì se contèm como lo re faraom con lo so oste morì in lo má Roso | ► |
Chì se contèm como quelli de Egito zem apresso a li figij d'Issael.
e che tuto lo oste passe davanti um fiume davanti lo mar, e quando faraom saverà che lo povo sea lì, si penserà che i seam tuti preixi, "persochè o non porei andá ni avanti, ni inderé, e cossì indurerei lo so cor, che o ve verà deré per tornáve in Egito, e mi ge sarò a l'incontro, e lantora li Egiciem cognoseràm che sum Dee poderozo sorve tute cosse". Alaora li figij d'Issael zem per la via che Dee ge avea comandao. Or stagando cossì lo povo, o fo anonciao a lo re che quelli de lo povo d'Issael se ne fuzivam, e incontenente lo cor de faraom fo indurao, e cossì de tuti li soi vasalli, contra a li figij d'Issael, e fon pentij che elli li avessem lasse' andá, e disse a li soi vasalli: "Che è so, che per ta modo e amo lassao andá quello povo, or che ve pá de fá, che, se noi li lassamo andá, e perderemo tuti li servixi che e ne soleam fá". Or acordanssem tuti a um comando che elli insisem tuti fora, soè li cavi de l'oste e tuta la cavalaria de la terra, e tegnivam la via che aveam faito li figij d'Issael, e menàm con ló caroci tuto lo lor per forsso e le carrete de Egito, e lo nostro segnor Dee avea indurao lo cor de faraom e de li Egiciem contra li figij d'Issael. Or l'umdeman, quando li Egiciem fon asenbrai, insìm de la citade[sic] e zem derré a li figij d'Issael, e trovàm la lor oste a la riva de lo mar Rosso, e tuto lo povo de lo re faraom si era tuto recogeto in um logo chi a nome Brasam. Or quando li figij d'Issael li vim che li Egiciem vegnivam contra lor, si avem grande poira e si criàm inver lo nostro segnor Dee, e zem inver Moizes e ge dissem: "Non era in Egito sepoture unde se fossemo posui soterrá si che per gracia ti ne ai mene' a sepellí in queste arene, a esse morti per le maim de li Egiem[sic]? E perchè ai-to faito so? E perchè n'ai-tu traito de Egito, unde n'era monto megio serví a li Egiciem cha morí jn le arene, e in questa foresta? E questa è bem la raxom che e te dixeimo, che noi non voremo insí de Egito per andá in atre terre". Respoze Moizes: "Non temei, avanti, stai in paxe, che o veirei tosto la possansa de lo nostro segnor Dee, e la grande maravegia che o farà anchoi per voi incontra a li Egiciem, pu e ve meteràm poira, e de li a pocho o non ne veireij nissum, persochè lo nostro segnor Dee conbaterà per voi, e voi starei in paxe".