Walther de Belmont/2

../

../ IncludiIntestazione 29 febbraio 2016 50% Da definire

Walther de Belmont Walther de Belmont

La flur de Ramuosch.

 
„Il nuorser“, Probe aus dem Epos in den Annalas, S. 164, 1909. (Chur.)
Denton vegn il paster dell' alp Discholals
Neu en tiel nuorser sin visetta.
Bien pen e tschagrun el port' en vischals,
A vitg el po star in' uretta.
5 Spel fiug della fueina, che port' il parlet,
Els sesan el ficler schiglioc schi quiet,
Il paster entscheiva, rischuna
Las detgas de quolm de sperts e barlots,
De schenta selvatga cun faschs e fagots,
10 Che fan la burascla che tuna;
Da noblas filieras, che filan lur glin,
Sil pez e sper sontgas fontaunas,
Dad aultas dialas de bien origin,
Da nauschas uldaunas en taunas,
15 Da salicas giuvnas, dunschalas de neiv,
D' unviern che pervesan camutschs en la seif
Din jert sut la pezza Arina,
Da sperts de montogna, ch' han sut il glatscher
Magnificas salas cun tetg e clutger
20 E sin in tron crap lur regina. —
Dall' jarva plein forza raquent' il pastur,
Ch' ils ivers pli baul empleneva;
Ch' ei setga dil tut ed ha pers sia mur,
Demai ch' in signun smaledeva;
25 Ch' ei setga, perquei ch' in fumegl ha tradiu
La sontga Marghiata, ch' ins veva pladiu
Siat stads per gidontra en tegia. —
Depi quei puccau ei tut pegiurau,
Tras bovas, purginas e vent malstemprau,
30 Che plir' uss e plonscha e megia. —
Envi a maner lu retuorn' il vischin,
Gl' amitg della praula e detga. —
Ed ord la furnascha prend ussa Florin
Tizun de scanatscha bein setga.
35 El va sill' uatga, guardont tut endretg,
Che buca igl uors fors' attachi anetg
Las nuorsas ad el confidadas.
El fa sia runda pitgont cun il fest,
Seferma, smanatscha il tizun sin il crest —
40 A bestias el stgir laghigiadas.
En l' aria treis cruschs cul tizun ardent
El segna per dar garanzia;
Sogns plaids er compognan il siu moviment,
El cloma ferm l' Ave Maria.
45 Da Diu el implora schurmetg ed agid,
Als sogns el termetta siu laud e salit —
Las nuorsas sesentan segiras. —
La notg ei quieta, il tschiel grazius,
Sur pez e vallada ruaus misterius,
50 Rugada dat giu sin pastiras.
En baita sepeina el per ruassar:
„Sogn Pader en tschiel mei dormenti,
Sai buca damaun, sch' jeu pos puspei levar,
Sogn Fegl, ch' ei levaus, mei leventi!
55 Sogn Spert ch' ha Maria ornau, biala flur,
Pertgiri mi' olma e sia honur,
Sin tiara termetti bials aungels,
Sul tgau, giu da peis e da mintga vart,
Ch' ei tegnien naven tut noscheivel malart,
60 Levgieschien ils fleivels e staunchels!“ —
Las spundas alpinas s' orneschan plaunsiu
Cul tgietschen de fluras striauna:
Las nuorsas fan prova, lur dies blut tundiu
Puspei secuviera cun launa.
65 Solegl e bialaura, tschageras e tun
Baul vegnan, baul van, tutta stad, tut atun,
Suondont sco domond' e risposta —
Al giuven cun fatscha sco in fin valî
Las gnialas carschidas van giu sin schuî,
70 El crescha, stat ferms e sedosta. —
Ei vegn la scargada! Sul vitg en in claus
Stat la montanera turnada.
Leu stat il nuorser, dals vischins circumdaus,
Duront ch' ei vegn fatg la zavrada.
75 Rueida sin plazza! Clamar e beschlar:
Las puras sedrovan mintgina d' anflar
Ils tgaus cun lur nodas — ureglia,
Retscheivan las mummas turnadas cun tschut,
Fan metter sin gliesta tut suenter statut
80 E passan lu ord la purteglia. —
La Gielgia, la sora dil segner plevon,
Envid' il nuorser a merenda;
Persuenter el gida e siar' en cammon
Las nuorsas en stalla — pervenda.
85 „Dieus seigi ludaus, ti statteivel nuorser,
Beinvegni en casa, ti flur dil glatscher,
Tei lauda uss la montanera!“ —
Paternamein prend' il plevon per il maun
Siu giuven amitg e fa seser sil baun
90 E prender cun el la tschavera. —