Walther de Belmont/1

../

../ IncludiIntestazione 29 febbraio 2016 50% Da definire

Walther de Belmont Walther de Belmont

Quart Act. Sil Mundaun, in plaz liber el liug della battaglia historica. Il funds della sceneria po representar ils contuorns dil quolm. Ina tenda (zelt) sco el secund act. Walther e Fontana sin peis, armai.

WALTH. La notg ei stada criua cheu sils aults,
I. Scena. E steilas paucas, paucas han dau glisch.
FONT. La neiv dils quolms sto render freid la notg,
Schegie ch' il matg ei sil Mundaun vegnius.
5 WALTH. En num de Diu nus entschavein il di —
Dal di ded oz dependa bia, fetg bia.
Jeu sentel, che mi' olma ei squitschada,
Serrada sco la pezza surglatschada. —
O Diu, il qual muentas las lavinas
10 E libereschas dal galatsch las pradas,
Dai levgiament all' olma surcargada,
Termett' a nus la leva primavera!
FONT. Tgei vista admirabl' ins gauda cheu!
Mirei l' entira Foppa, schi flurenta,
15 Schai cheu avon nos peis sco in curtgin.
Il crap de Flem leu vi cun vies casti,
Ils pezs de Trin sesaulzan maiestus,
Gl' uault, il grond, surves' ins cheu schi bein,
Ils vitgs sin tuttas varts bugien ins dumbra,
20 Ils quals salidan giud las bialas spundas
Dad omisduas varts dil Rein e Glogn.
WALTH. O car amitg Fontana, la Surselva
Numnein nus nossa patria maiestusa.
Per quella biala tiara lein nus batter.
25 Negin tirann duei cheu penetrar,
Negin duei scatschar nus ord la patria.
FONT. Ei para sco sch' il pez Mundaun derschess
Niev anim en nos cors, e nova forza.
Nus vein davos il dies ils purs dil Glogn,
30 Jeu sai tgei pugns els han, quels de leu en.
Sche quels sevolvan cul burriu anora,
Lu paupra giunchers de falombra gnarva.
WALTH. De quei sund' jeu pertscharts, amitg Fontana,
Sch' ils purs dil Glogn semettan en cun nus,
35 Lu gudignein nus la victoria frestg.
Jeu enconuschel quels, ils valerus,
Statteivels ein els sco ils pegns ded alp,
E serius, fideivels sco la greppa.
Ei pondereschan tut madiramein,
40 Pil veritabel bien sescauldan els,
E san tener la dira ditg e ferm.
Ei dat de gudignar lur confidonza,
Mo attatschai ein els a vers amitgs,
Ed arvan si lur olma bein profunda.
FONT. Vos pardavonts han fatg bein bia dil bien
Cheu en Lumnezza. Lein mirar uss pia
Sch' il simpel pur semuoss' er engrazieivels.
WALTH. Jeu hai termess il Lumerins a Vella.
Il Hans de Mont ha leu rimnau il pievel:
50 Jeu spetgel vess; il di s' avonza schon.
FONT. Empau de plauns ein ei, mo arrivai,
Fan els il lur duer senz' envidar.
WALTH. Va vi sil crest e mira, sch' els comparan.
FONT. Ei vegnan plaun, mo ton pli saun, pazienzia!
(seniester giu)
WALTH. (persuls, mont vida neu, occuppaus internamein).

55 2. Scena. La mar grisch alva de tschagera spessa
Entuorn ils quolms sesaulza e setschessa
E cun la massa greva de brentinas
Semischedont sesaulzan ord ruinas
Fimaglias neras dil marcau berschau.
60 Il bab a Glion endira en cadeinas
Il signeradi dat suspirs da peinas,
Da plagas fatgas cheu cun fiug e spada,
Da tiranias nauschas de bargada,
Che ha nies territori inundau. —
65 La libertat, la veta, la ventira
Stat ussa sin balontscha malsegira.
Miu cor entir sesaulz' encunter vus,
O cavaliers enguords e turpigius.
Duein nos vitgs curdar en tschendra tuts
70 E da tiranns retscheiver lur statuts?
Duei la casa de Belmont curdar
E Werdenberg, Montfort cheu regielar?
O mai pli mai! Cheu stein nus ferm sin posta,
Il pez Mundaun cheu porscha sia costa,
75 Cheu battel jeu avon che sperder tut:
Entochen tier la mort: — Quei ei miu vut! —
O Diu en tschiel, dai forza a miu bratsch,
Protegia nus e nies patern terratsch.
(el va vi e neu e mira egl ault)
La cruna dil Mundaun ei gia sclarida
80 E tras las neblas ei la glisch vegnida. —
Jeu tei beneventeschel, bi solegl
O co hai jeu spitgau si tei marvegl.
(La tiba dil paster selai udir davos la lautga)
Tgei tuns ei quei? … Salids de quolm, pilver!
(el mira anavos)
Ils bravs pasturs, fumeglia dil de Mont.
(Ils treis pasturs digl emprem act comparan armai. Il
signun ha in turschet d' uiara sin schui; il paster porta
la tiba ed in halumbart, il tersiel in pal.)
SIGNUN. Ualti dils emprems! Ser giuncher Walther.