Rime milanesi (Pertusati)/Per la mort del sciur Cont Ambroeus Cavanagh
 |
Questo testo è incompleto. | |
| ◄ | Per la festa de San Luis Gonzaga | Pre Lissander Garion a Meneghin dopo quell terribel oragan che l'ha traa a terra vun de quij angeron che stava sora la facciada de la Gesa de Sant' Anger. | ► |
- Per la mort
- del sciur Cont Ambroeus Cavanagh
- SONETT.
Pover Cont Cavanagh! L’eva mastransc,
Ma i stremizzi e i mal vitt de sti duu mes
Me l’han consciaa pur tropp pesg che on pom ranse,
E l’è la in del carlee longh e destes.,
N’evel mò mej magara andà coi scansc
E stà, costa che costa, al sò paes,
Che nè ruzzass fin chì per vedè a piansc
Su ona locanda on crœucc de Milanes?
Brutta Catterinin di costajœur,
T’ee sfogaa la toa rabbia contra on omm
Che l’eva on Pater patriæ, on omm tutt cœur:
Ma sappia con rossor che el tò folcin
Quand el trà a terra on fior de galantomm,
Nol serv che i terrorista e i giacobin.
- Sul’istess argument.
- SONETT.
Lontan dai sœu de cà squas dusent mia,
Mezz deroccaa per retenzion d’orina,
El nost sciur Cont Ambroeus ona mattina
L’è colpii dal sò maa su on’ostaria.
Se fa vegni el dottor, ch’el tocca via
Col rezipee: solass, bagn, medesina:
Ma impunemanch la fevra la se ostina:
E in quell di quindes dì l’è in angonia.
Lù el domanda e el rezev i Sacrament;
Lù el perdona de cœur ai sò nemis;
Lù el fa con gran frescura el testament.
Piangen i amis che ghe stà intorna al lecc;
Ma lù el vola ridend in paradis:
Inscì mour on Cristian del Credo vecc.