Raccolta de proverbi milanes/Proverbi
 |
Questo testo è incompleto. | |
| ◄ | Prefazione |
RACCOLTA
DE PROVERBI MILANES.
SESTINN.
1
El pocch l’è pocch, e tutt i tropp hin tropp,
E dûr con dûr, nô farà mai bon mûr;
Per el tropp caregall se creppa el s’ciopp;
Bœugna che croda el pomm, quand l’è madûr;
Per el pù chi tropp studia matt deventa,
E chi studia nagott, porta la brenta.
2
Se romp col tirà tropp: chi cerca, trœuva;
Nô van denter i mosch in bocca ciûsa;
Quell ch’ha pussee giudizi, pù ne drœuva;
Chi vœur mazzà el sò can, trœuva la scûsa
Destrugga nò, che ven tuttcoss a taj,
Quand se dis, fina i ong de perà l’aj.
3
Error nô paga debet; acqua lava;
Cavall donaa, nô se ghe guarda in bocca;
L’è pù quell terap che Berta la filava;
Chi pò comanda, ha d’ubbedì chi tocca;
Nô gh’è dubbi, ch’el bon regolament,
El manten tant i Fraa, come el Convent.
4
L’è cert, che sangu d’on mûr s’en pò trà nò,
Anca di pugn in ciel nô s’en pò dà;
La legna del vesin fa on bell fallò;
Dance paga, e cavaj se fan trottà;
Quell che se impara in temp de gioventù,
Disen? ch’el se desmentega mai pù.
5
Fidass l’è ben, ma nô fidass l’è mej,
Sora ’l tutt, guardet dai partii tropp grass;
Divers í coo, divers hin i cervej;
A primêra, i duu ass mennen a spass;
Chi renonzia al fatt sò prima ch’el mœura,
Merita d’ess côppaa con la mazzœura.
6
Nô gh’è pesg sord, de chi nô vœur intend;
Bella rœusa, deventa on grattacuu;
Chi scolta compra, e chi ciociara vend;
L’è mej stà ben vun soll, che maa in tra duu;
Ara drizz, e pϝ mangia, e bev, e caga,
E nô te cascia, c lassa che la vaga.
7
Chi pissa ciar, ha in quel servizi el medegh;
Chi all’asen lava el coo, trasa el savôn;
Chi predega al desert, stralatta i predegh;
L’ignoranza fa i corna a la reson;
Quell che lavôra ha ona camisa, e dò
Ghe n’ha quell’olter, che lavôra nô.
74
Guarda de nô soltà de la padella
In del fœugh, e pœù guardet di segnaa;
L’è ia vittoria de poricinella,
Bajalia, e infin del cunt vess bastonaa;
Drœuva de spess la guggia, e la pozzœura,
Per fa sta insemma anmò la camisœura.
75
Sibben, che sien i matt che inventa i mod,
I savi pœù ghe van adree anca lôr;
In tra i duu litigant, l’è el terz che god
Nessun nass, nè majster, nè dottor;
Nè de temp, nè tampocch de signoria,
S’ha minga de casciass malinconia.
76
Madura i nespol con la paja e ’l temp;
Se quista scienza con pazienza e temp;
A chi tocca a speccià, par longh el temp;
Riten, che per pagà, nô manca temp;
Ogni cossa a sò temp, da temp al temp;
E chi gh’ha temp, nô l’ha de speccià temp.
140
Nô pretend coss illezit da on amîs;
Nô fidet de nemîs reconziliaa;
Pò piasè el tradiment, ma per tò avvîs,
El traditor da tucc l’è detestaa;
El fin corona l’opera; donch mì
Hoo salvaa stô proverbi per fenì.