Ra grotes de Volpera

Ẓon adès a visità col pensiero ra Gròtes de Volpèra. Sote Crépa, (Bélvedere) verso el pian de Ciampo (villaggio), l' é un bel bosco, ma can che se va inze, se vede sasói che fèsc paùra, toche de croda un sora l' outro che i s' a destacà in tempe antichisime da ra montagnola de Crépa; e i disc ch'i èbe seporì un vilagio. Sote chera rovina de crépe se vede de ra gran cavernes e de ra conca magnifiches cuertes de erba. Inze mèẓo a chel càos de sasc; de buge e de cavernes, ch' i ciama ra Gròtes de Volpèra, se ciàta un bel sito che vien nominà: - ra Gégia de Maria de Ẓanin.

Riguardo a r' origine de sto gnòn, eco ra storiela che se sente contà.

- I Romane par ẓi a ra piaza fortificada de Auguntun i vegnia pa ra strada nominada Via Claudia che ra pasàa par Ampezo, e anzi ca i aéa betù 'na compagnia de melitare. Un comandante de sti soldade romane el s' avéa inamorà d' una bela toṣa, 'na zerta Maria de Giovanino. Éra però ra no voréa insavé e ra no i dagéa bada; ma el 'l i ẓia sempre daòs e 'l no ra lasciava mai in pasc.

Par scampà da chel insolente chera por toṣa ra se ritiriàa a preà inze pa ra Gròtes de Volpèra ch' eṣ non èa tanto in da lònẓe da ra so ciaṣa; e ancora al di d' ancói un de chi luóghe, d' un aspeto imponente e romantico, i lo ciama col gnòn de chera por perseguitada: - ra Gégia de Maria de Ẓanin.