Prose e poesie bellunesi 2010/Me vardo intorno
 |
Questo testo è incompleto. | |
| ◄ | 24 | 26 | ► |
LAURA GASPARI MORÒTA
Me vardo intorno
.
D outon, pi che mai, me sà bel me bete un bon maion cioudo, daerse ra porta de losa e min ‘sì defora, inze meso i bosche. De chesta stajon i à un odor duto so: odor da mus-cio, da umedo, odor che me fesc capì che ra natura se moe, che l ziclo de ra stajos el sin và inaante trancuilo e gario, senza che nos fajone algo par i dà na man.
Me sà bel vede che ra natura sà pi de nosoutre, che ra fesc chel che r à da fei senza bisoin che calchedun i dighe cemodo. Chesto me dà na sensazion de segureza che nuia outro me sà donà.
L é da vardà ben polito agnoche se zapa, ‘sobas. Po senpre esse calche zeramandola negra e lustra ch a se moe svelta inze r erba o che ra m à sentù ruà e r é là ferma, come scuro sas, col cuore ch i bate svelto, spetando che feje ió el prin pas par min ‘sì o mangare par i fei del mal. Ra no sà, por bestia, che ra me fesc solo nafré de grizo!
Canche see pizora es ciapae inze man, es carezae passando el palpin, pian pian, da ra testuca fin ‘so in son de ra longa coda. Es no scanpaa mia. Fosc che l cioudeto del mè diedo l ea na roba noa par eres e i saea bel, opura el teror l ea tanto da no podé gnanche pi se moe. No sei!
Fato stà che ades fajarae fadia a ghin tocià una, e me despiaje. Calche ota, anzi despes, sarae meo tornà a esse come ra famea, curiosc, alegre, senza malizia e pies de mereea ves el mondo intiero.
Alzo el nas da ‘sobas. Respiro forte r aria che taca ormai a pizigà ra pel. I raje del sol se fesc strada spavalde inze meso i rame smagrade dei brascioi. Ra foies, che es à nafré de linfa che ancora i core de inze, res luje de un verde trendo, mai vedù.
Cheres che ormai s à rassegnà a tomà ‘sò, a dispeto de ra morte ‘sò par pede, es s à tento de colore che bete alegria e che sciouda i por brascioi deboto nude: ‘sal, ros cupo, ran, maronzin … penelades ben dades sul sfondo de un ziel coscita zeleste … che se l snasasse l arae odor da pitura ancora fresca!