Prose e poesie bellunesi 2010/2
 |
Questo testo è incompleto. | |
| ◄ | 1 | 3 | ► |
PIERO DE GHETTO DE ROCHE DE LISEO (1932)
Ettore Sacchet.
L é passà pi de trenta ane, ma me la penso come che fosse iniere. L era da carnaval e ize sala dei Coce se balaa (l era ancora l “Albergo alle Alpi”). Nane Auzel sonaa l armonica, Tone Fachinel al sassofono, Luciano de Primo la chitara, Luciano de Ijio Osto la bateria: nó me penso pi ci che sonaa al basso. Dintorno de la sala, l era na riga de carieghes agnó che se sentaa do chela femenes: chi omin i dea a les tol su par balà tango, valzer, pulcres e mazurches.
Ió e la mè femena aeane invidà zinche amighe todesche. Intanto l é ienù ize Ettore Sacchet. Chi da Borcia de na zèrta età i sà ce n arte che l era: stranbo, lunatego, inpermalos, ma canche l era da laurà o da fèi comedia al no se tiraa indaos. Bastaa an goto de vin par al bete a dì. Canche al simiotaa Charlie Chaplin che menaa in giro Hitler l era unico. L era bon de di stranbolote senza senso. Al fasea finta de parlà todesco: “Dilàine diléghen, davìten perènes, malicofilónen sitànen velìnen”, e così par dies menute. Coi mè amighe se aon betù d acordo: prima i aon pagà da bee e daspò aon betù an taulin davante l orchestra.
Canche Ettore l à scominzià a predicà, aon scominzià a bate le man; n ota i todesche che fasea straie par todesco e dute chi autre par talian. Argo da bel. Là davesin, poià su par la spaleta de la porta, l era ienù ize an on foresto che vardaa. L aea la iacheta poiada sun braze e al ciapel ize man. Avarae dito che l era an contadinoto de la bassa trevisana. Canche Ettore l à fenì la so tiritera èi vedù chesto on che se betea su la iacheta e, prima de dìsseno, col ciapel ancora su man, èi sentù che l disea: «Nó capisse che raza de paese de mati sia sto cua …»
(Borcia)