Poesie ladine bellunesi/9
 |
Questo testo è incompleto. | |
| ◄ | 8 | 10 | ► |
LORIS SERAFINI
I stranbiez d’i nost paes
(Piciol matez su le usanze starleche che se caluma al dì d’ancoi nte la Val de l Biois)
Nosacande, nosacai
ai sentù mi n dì descore
de noseche burt travai,
de nosaul zerte malore.
De na cubia el me contea
che la usea rajonà
e daspes pò la breghea,
soratut daspò trincà:
par dasen su tante robe
nia no l era no falà,
ma pì tenp mi no ve robe
e sta dent ve ase scoltà.
“Fuse mi ente sta mesa
pì nogugn no restarave
e darè na bela sfesa
tuti inte i ficarave”.
“Ti sì, Tone, t’es senzier,
te la vede da l vers dret:
avon sol da fai dover
a i nost siori malandret”!
“Mi laore, lori i magna,
no i vadagna, ma i fa scheI
e i a saldo na magagna:
paga un e cioli trei”!
“Ma mi sì che l desfarave
sto governo de vediei
e su i alber tacarave
sta gran cubia de porziei”!
“Noi sion pochi, vosto chè,
cognesane se sturtà,
così po voi vedaré
la fin burta chi a da fà”!
Disto chè, orpo debìo,
mi nte n manec ciaparave
e de teghe nte l dadrìo
el sò cul mi npienirave”!
“Lori i strusia masa poc,
da l sudor i é desusai,
ma de schei i a senper foc,
la no i é no ntardivai”!
“Le luganeghe picade
e i viaz estra n pì pagai,
i ghe n conta de tonade
a noi pore ndormenzai”!
Slonga, scurta e tinonea,
i a pensà a na soluzion,
e no sté avei maredea
se i a vert en nof bozon.
“E no l é no na monada
se dison che aon reson
che la dent la é tant cruziada
da sti gran sparonzonogn.
Somea fin che laora smauz
sie venù en nof pecà,
e se conpra su chi sgnauz
che te fa domai ngrasà.
L é na granda mincionada
a l Caselo nazional
che parfin cavìa a Valada
l é pì vache che n Canal”!
“Nte l paes che l gran Piovan
om e candole a sturtà
stale voite par tut l an,
gnanca ciorle l é resta.
Ma sarìelo poc da ride
come fuse n bel matez;
asé fin che mi ve dighe
che capìs de pì en pez.
Siega canp e fruga fauz
e laora n pì debant
par sti rogne de scarauz
da n burt zef che par piandant.
E ti proa se t’es bon
a dì a vende l fen madur:
varda po che nte l gaon
no te l bute de segur!
Se po a fonc t’es ‘sià par dì
varda che no sie de mercol
parche po te sa nca ti
che n chel dì ogni fonc vien svergol.
Tut cognon pasà par Roma
e l è chest el pì gran mal;
se tafat l é drìo che l toma
ghe n paìs daspò sta val.
Parche noi cater cauzogn
sion cenui da chi falache,
i ne crez di zavatogn
bogn domai a cenì vache.
Ma se oton el nost descore
su i forest e zerti slac,
zerta sort de secaore
che sarìe da trà nte n lac,
disarai che da rostogn
se vez dent che ausa tant
a fai i pore pantalogn
par ciapà su tut debant.
I é canaole piegn de schei
ma po nìa no i vol pagà,
i te capita n dotrei
e l paes i vol canbià.
No i vol pì che t’i desede
dadoman co l canpanon,
i te trata come fede:
“chilò fon chel che volon!”
I te luga co i scarpet
par la ota di Lastei,
sponta fora nfin i det
e daspò i a mal a i piei.
Zerti stof de zerte siore
che te fa tra sù l figà,
che par ele par degnore,
ma ti proa mo a snasà?!
Co t’es inte par sti bosc
par sta n pas par calche cin
e te sente os da rosc:
i é segur drìo n per de pin!
Ve sparagne de ve dì
che chi ase nte sti troi,
pò diseme se saorì
dé a zarpì i vost pezoi!
E moi, giasene e garnete,
stropacui e asie e fraghe,
vedovele su le tete
e po l rest ente le braghe.
E debot po ti te vede
par cal loc ch’i é pasai,
gramazé e bon sarevede
a i paesagn tardìf lugai.
Nia no i vif no polinpont
a fa tant i sparagnogn,
e co i pasa l ultim pont,
la no i pos fai i tornazogn!
Ma l é ora oramai
de sti coss che noi tasone
e valc auter disarai,
de segur no conte s’cione!
L é venù da n pez l’usanza
de se vede pore gram
e se crez de avei creanza
a descore par talian.
No ve dighe che spegaz
che ven fora inte par mez,
e dasen te toma i braz:
el descor mejo n scavez!
Così i pensa de ese grant
e descore da dotor,
ma no i sa po dì diant,
i ghe n dis de ogni color.
Somea fin ch’i se vargogne
de l descore d’i nost veje
e i npienìs de zento ogne
sti tosat nte le fameie.
E sti boce che avarali
se nìa noi no ghe nsegnon
e a l paes se tacarali
se perdion le tradizion?
Ma asé che mi ve conte
de valc auter ncora n freo,
disarai de mese onte
e barufe par en scheo.
I stranbiez de sti paes
si vez beleche da l poc
co suzede che daspes
se fa beghe par en loc.
Se ti n termen dù te frache
cater schei en cin pì stort:
da sperà che no i la tache,
de segur t’a fat en tort!
Se te ntìve calche sas
e te l caze en freo pì n cà,
cente po da cont el nas
se ti ntier te l vol catà!
Che se luga chel de là
de segur ti t’es en faos
e par fenta te a falà
par dora de pì la faoz!
Ma n ocor che zavariede
par savei faziende straze,
se sté chiet e volé ziede
mi ve n conte de pì paze.
Ai sentù che n nof filò
l e da poc en ca tacà;
no credé, venì mo po,
no ve faze mio matià!
“Taie, legne, doi ridole,
ronconele e manarìn,
calche laz e dotrei spole
e daspò doi nof lodìn”
Sto bel valc se sent descore
co valgugn l fa l ultim viaz
e i starave là doi ore
se no i fuse a Vendramaz.
I parent i pianz ladìn,
el Piovan dis su rosare,
e chi auter: “Da ca n cin
dirai su par chele vare”.
Somarende mi, Signor,
che comedie da valdìo
che chi vif drio chi che mor
i fa su tut en desìo.
Ma dison che la ntenzion
no la sconz po nia de ruo,
ma che val l é l’inpresion
che se frache du caruo.
Donca lora l’é lugada
che su tut enfin sturtone,
de sta longa slomenada
volaré che la mocone!
Tanti vez avon vedù
chi ne basta par sta bota,
fursi masa ai descorù,
calche cin l ai dita zota!
Ma sto pìciol mè matez
a valgugn el conferìs;
e sarà anca chi vez
valc de biot da ride fis.
Noi ason stà la i nost ugn
e se n don a i nost dafai,
che no vede pì nogugn
che ave i voge desedai.
Sarevede, gramazé
e scuseme de l tenp pert;
ve ase dì, se voi volé,
che ogni bronza ve ai descuert!
(Canal)