Poesie ladine bellunesi/La mula e la rossa
 |
Questo testo è incompleto. | |
| ◄ | 16 | Poesie ladine bellunesi | ► |
LA MULA E LA ROSSA
(DOI CAURE CHE SA CHEL CHE LE DIS)
Rossa:
Ciò mula andó vasto
de chela caiuda?
Fermete e scolta
magna sta fiuda
sto pugn de parmors
sti cuatre lavaz
e davant de doman
te tome du bas
slanghida da fam
inte mez al ledam!
Con chel che i te mena
a magnà sti sfondrai
se no te te range
an sin per sti prai
co i te para a le zinch
sul pi bel del istà
l é poco da ride
l é puoch da parlà:
al lat int’i corni
al tol su e l sen và!
Mula:
T’as mile resoign
ma se vegn al guardian
al ne caza la multa
tant cua che sun pian;
noiautre no sion
le fede del Gino
no le sante protete
del Nume … divino,
che svangare le pùol
per canp e per prai
senpre vedude
ma tocade po mai,
parone espoteghe
de Ron de Ghedina …
ma l é meio che tase
son senza brondina
no n’ai canpanel
son tant puareta
inte stala i me cagna
de fùora i me peta
e l Matio guardian,
sto nato d’un can, …
l é propio cossì,
al l à fissa con mi.
Rossa:
Calmete, mula;
ragiona, te vede,
la colpa no n’é
de chi che te crede:
al Matio guardian,
puaret anca iel,
se l é par sa cont
al no te storde un cavel.
L é stat costringiù
a scomenzà fà cossì
e piantà la baraca
e tol su e sen dì.
Mula:
E del rest te dirai
forse doman
i é dà na pedada
al perde sa pan;
al Comun de Zopè
l é an cativo paron
al riconpensa de zerto
con en bon spedazon;
no i ela tocada
al Paulin de Zubiana
al Mache e tainc’ autre
ai mistri pi bogn?
Con zerti parogn
la toca cossì;
anche chi da le vache
la i é tocada ben bela
a cognì se reduse
a fà l formai inte padela;
na comare polito
an maestro che sà
i no l vol se l no beve
e se l no sà s’inciocà;
co la stessa moneda
col cuart e la meda
i se conpra e i se vende
i se stima e i se defende:
trei furbi, cuatre stanpiogn,
un sol co la barba,
chi autre barboign;
e noiautre giolate
inte cheste zavate
aon bù da tomà!
Rossa:
Ades te n dighe an autra:
ai sentù che al sbraghesson
l à già dit che l an che vegn
i ne sera inte casson
e se l dis chel (che vosto?)
na tirada inte chel spac
e chi autre i bate l tac
cossì come l vol iel !…
Giopin giopin giopela
dodes popi e na cordela
tirada con trei maign
eviva i tananaign …
Mula:
Ti t’as nia da ride
ma mi me seca l ure
a vede zerte robe
a sentì zerte bravure;
co pense a chi tondìei
a chi cuatre rodolam
vorave i avé inte man
da ie dà int’i zervìei;
davant de te molà
i te smoca le onge
che no te abe da gratà! …
Chi de Comun che toca? …
No n’é na novità,
ma le maign su la zoca
i avarave da i poià;
se i fosse come mi
garantisse in trei dì
in cuatre e cuatr’oto
che chel de la Maria del Loto
metarave a comandà
e son zerta e segura
de l’onesta fegura
e no n’avessone pi
na piatola inte l ciap
che ne fa piande cossì;
ma che vosto dì a fà
l é n paes de stanpiogn
che se laga dugolà
come tainc de torondign:
ignìer perché i era negre
incùei che i é invinai
anzi dute tacolai
secondo la ocasion
e se ne rua su
ogne tant calche cagnon
co la scoa a spazà su
se anpìs anche l cason;
e i vol esse pagai
e pò che si à magnai
i pez sion stade noi …
Mula:
E su con sti mandati
e dù co sti tondìei
e chi autre mandolati
a bate i marciapìei.
Giopin giopin giopela
dodes popi e na cordela
tirada con trei maign
in barba ai tananaign;
e cresce e cres la panza
se conpra a balanza
e se vende a mesura
infin che la dura
e infin che la và,
Giopin, giopin, giopà.
Rossa:
Ades po te dirai
che dute in general
chi che ne voleva mal
al Signor i à castigai;
per cont ch’i ne daghe
per cont ch’i ne mande
i no rimedia piaghe
né i ne salva fronde
e dute cuanc’ i sà:
andó che la é stada
l aiva la pùol tornà;
e alora me console
a nome de le giole
de la fin che i à da fà! …
Ma ades l é ruà l guardian
e l é bon de ne pegnolà! …
La caura de la Alba e chela de la Mussica
(Zopè)