Poesie friulane/Vilòtis di guère/Friùl
 |
Questo testo è completo. | |
Ercole Carletti - Poesie friulane (1920)
Friùl
| ◄ | Vilòtis di guère - Dulà seno? | Vilòtis di guère - Nol è timp | ► |
Friùl.
Lis montagnis in coròne
bièl turchinis di colór,
e la név de mònt Çhanine
che sòt sère ’e fàs splendór;
e, par tant ch’al còri il vóli,
cuànd che il cil al è plui clar,
pràds e çhamps, paisùts e gravis,
e il barlùm lontàn dal mar.
Dòme, un rèful di chèl àjar
nus darès cuàlchi solév;
dòme il sal des néstris aghis
studarès la néstre séd;
dòme un raj di chèl soréli
sçhaldarès i néstris uès;
dòme un bùs di chés polzètis
torna zòvins nus farès.