Poesie friulane/Morosèz e matèz/Gnòt di vint
 |
Questo testo è completo. | |
Ercole Carletti - Poesie friulane (1920)
Gnòt di vint
| ◄ | Morosèz e matèz - Matèz | Morosèz e matèz - Pulìtiche | ► |
Gnòt di vint....
Tai àrbui dal stradòn va businànd la buère,
còme un mar in boràsçhe. Bat la plóe d’autùm
sui véris.... Une vôs si ’é sveàde stesère
dai sfuejùts inveçhîds, un pôc zai sòt la lum.
Dòpo tròs agn? Mi par che ançhe jò mi disvèj....
Jé sfantade in un lamp mièze vite, se pur
m’an vanze. ’O scólti atènt il pàs dal timp. ’O lèj,
e un’angòsse mi strènz tal cuèl, mi sglònfe il cur.
Scròche un scur di balcòn, disóre. La frutine
’e duàr sigùr des cuàtri te só scune, e no sint
sussùrs. O fórsi, in siùm, ’e rîd a la pipine,
di fra i sgardùfs, cujète, in chèste gnòt di vint.