Poesie (Porta)/98 - PER EL MATRIMONI DEL SUR PEPP VANDELL DOTTOR FISICH COLLA SURA TERESIN SILVA
 |
Questo testo è completo. | |
Carlo Porta - Poesie (XIX secolo)
98 - PER EL MATRIMONI DEL SUR PEPP VANDELL DOTTOR FISICH COLLA SURA TERESIN SILVA
| ◄ | 97 - L'è mò vora cara lee | 99 - Rivi de Barlassina appenna adess | ► |
PER EL MATRIMONI DEL SUR PEPP VANDELL
DOTTOR FISICH
COLLA SURA TERESIN SILVA
Sonett
Viva sur Pepp el settem sacrament
che senza tanti smorfi e zerimoni
el ghe fà god in lecc comodament
on tocchellin tant bell de marcantoni.
Chè se ghe fuss quaj ciall, quaj insolent,5
ch’el voress sostegnigh che el matrimoni
l’è el sepolcher d’amor, foeura di dent
ch’el ghe diga ch’hin bozzer, ch’hin fandoni.
L’è el sepolcher d’amor per cert carogn
de miee, de marì senza cervell,10
pien de vizzi, de cabel e de fogn;
ma per marì e miee faa sul sò taj,
el matrimoni l’è el trionf pù bell
de quell’amor che l’ha savuu cobbiaj.