Poesie (Porta)/71 - SONETTIN COL COVON

71 - SONETTIN COL COVON

../70 - EL VIACC DE FRAA CONDUTT ../72 - AL SUR AVVOCATT GIUSEPP ANTONI MARTINELL IncludiIntestazione 27 settembre 2008 75% poesie

Carlo Porta - Poesie (XIX secolo)
71 - SONETTIN COL COVON
70 - EL VIACC DE FRAA CONDUTT 72 - AL SUR AVVOCATT GIUSEPP ANTONI MARTINELL

 
SONETTIN COL COVON

Mì romantegh? Soo ben ch’el me cojona:
mì sont classegh fin dent el môll di oss,
mangi, bevi, foo el porch in Elicona
e ai romantegh per mì ghe caghi adoss.

Mì quand canti i mee vers Apoll el sona,5
i Mûs se i ciammi pienten lì tuscoss,
se vuj on temporal Giove el me trona,
se vuj fà el ciall Amor me le fa in scoss.

Vener e i Grazi, quatter sgarzorin
che hin bej de tutt i part, stan lì per mì10
e me serven de tavola e molin.

Minerva in di travaj la me consola,
Morfee el me ninna e poeù el me fa dormì,
Bacch el me rasa i orzoeu, Priapp m’je scola.

Gh’ho Pann che me pascola15
quij quatter pegor che m’han faa el favor
de damm a Romma quand m’han faa pastor.

Gh’hoo Flora che la corr
a cattamm roeus, vioeur, gigli, s’cioppon
per tucc i sort de loffi e paragon.20

Su tucc quij possession
che hoo a ficc del Tass invers Gerusalemm
Cerer, Vertun, Pomona, Trittolemm

ghe stronzonen insemm.
La stà de mì, d’on mè comandament,25
l’avegh quand vuj o acqua o succ o vent,

che gh’hoo amis on spavent
de Ninf pisson, capazz se la ven fada
de fà on deluvi cont ona pissada,

e sont tutt camarada30
d’Eol, re de cert vent razza de can
che boffen come el prôs di franzescan.

Se mai quaj tolipan
el me secca la bozzera e el me sgenna,
ven volta Momo ch’el me le peccenna35

fina in fond de la s’cenna,
e s’el scalza, s’el mord o s’el repetta,
ciammi Nemesia e foo la mia vendetta.

Se me noeus la bolletta,
Pluto pietos, el capp di tesoree,40
el dessotterra on’olla de danee

sconduda i temp indree,
e spliff e splaff me je sgandolla lì
che l’è ona maraviglia de stordì.

Quand vuj intenerì45
el coeur de tigher d’ona quaj valdrappa
o tegnì a post quaj vergena cilappa,

de quij che inziga e scappa,
gh’hoo el Dio Netun che me sbaratta el mar
e me lassa toeù sù quell che me par,50

perla bej, gross e rar,
coraj stupendi de fà moeuv perfin
i balzann impiombaa di sottanin

di damm del bescottin;
se me ciappa la fevera, i dolor,55
gh’hoo Esculappi, Chiron, gh’hoo Igea che corr,

e s’hin minga assee lor
gh’hoo in fresch per on amis on Dio Monell
coj âl fina ai strivaj, fina al cappell.

Se mai vuj portà ai stell60
i prodezz sanguanent d’on quaj soldaa
can de Dio, fogos, desfogonaa,

gh’hoo lì bujent, prontaa,
arrosti caldi sott a la pattona,
Pallad Mart Briaree Ercol Bellona,65

con tutta la corona
di soeu berlicch berlocch, Megera, Alett
e Tesifon e Atropp di forbesett

e Vulcan del boffett
e i Ciclopp regolzaa cont adree on mucc70
de lanz, e spad, de frecc, de picch, de gucc,

e per ultem de tucc
la Maistaa Sova del gran re Pluton
col ghicc su on coffen de decorazion.

Se mai ven l’occasion75
che stanta a parturì quaj comarina,
ghe mandi Egeria o la comaa Luzina

a dagh ona manina,
e col sò ajutt, in manch che nol se dis,
la fà lì on bell Adon o on bell Narzis80

o on olter magnaris,
che col passà de vuna in l’oltra man,
de Cumina, de Edusa e de Statan,

el pò fass sù on magnan
capazz chi sa col temp de deventà85
on fior de ciolla de strappà la cà.

Se vun le stanta a fa
ghe fuu fà on vôt a Cloacina, e tracch,
besogna recorrer subet al tabacch!

Gh’hoo fin, per chi fuss stracch90
de tegnì indree on quaj fiaa che sforza i port,
el Dio Crepet cont el passaport,

e guaj a fagh intort.
Quand che se tratta de pettà in castell
gh’hoo Comm ch’el tira a voltra el bon e el bell;95

e se infesci el buell
gh’hoo la Dea Carna, ona zuresegona
ch’anch che la serva per Santa Corona

no la fa la cojona.
Se me tacca a la vitta on indiscrett100
d’on creditor che no me lassa quiett,

voo giò a cavà al fiumm Lett
quell’acqua che fa el gioeugh de incojonì
e se nol voeur bev lu la bevi mì,

e tiri innanz inscì.105
Se vuj viv a la moda e damm del spacc
col fà in commedia de paricc mostacc,

gh’hoo Gian de quatter facc,
gh’hoo Proteo al mè comand e gh’hoo Diana
ch’el ne fa giusta sett la settimana.110

Se me batt la mattana,
la paturgna, la motria, la scighera,
la corr Lubenzia de la bella ciera

a mettem lì in spallera
gratis-amore-Dei tante piasè,115
domà occasion de scernigh foeura el mè.

Se no poss andà a pè,
o per reson di pee o del calzolar,
né andà in tirosa come tanc somar,

gh’hoo lì cont largh i ar120
el Pegas ch’el me porta a sgoratton
in terra, in ciel, senza slisà i colzon,

e el gh’ha anca quest de bon,
ch’el scolda minga i ciapp al cavallier
come quij che i todisch dan in quarter.125

Se vegni del parer
de andà in barchett, magara a dì a Cassan,
o dininguarda anca pussee lontan,

gh’hoo subet lì ona man
de Driad, de Amadriad, de Tritton130
adree ai cord, a la para, adree ai forcon,

e gh’hoo fin coj sponton
Polluz e Castor su la straa lanzana
a cascià innanz la casa gambarana.

Se la giustizia umana135
la me pariss on cert socché in su l’oss,
o prest o tard gh’hoo Each, gh’hoo Minoss

che giusten lor tuss coss.
Gh’hoo per i donzellett, per i sartinn,
per tucc i cantarinn, i ballarinn,140

scuffier e madaminn
la Dea Voluppia che la pensa lee
a tiraj giò di banch e del pajee

e a postaj suj duu pee
su fior de soffaron tutt a recamm145
in par al venter e al baull di damm.

Infin, per no struzziamm
a nominann a vun pe run di fass
(che no l’è cossa classega el struzziass),

el preghi a ingenoeuggiass,150
a dobbià ben la schenna, a sbassà el coo
per l’ultema che adess nominaroo.

Questa, per quell che soo,
l’è la gran protetrizz di sazerdott
di damm, di cavalieri, di cercott,155

di comich, di divott,
di maester normal, di sonador,
di scolar, di lettor, di professor,

di serv, di servitor,
di impiegaa regg, di ricch, di postion,160
di ciarlatan, di musegh, di castron,

e l’è, senza eccezion
la morosa, la mamma, l’amisona
de tutta quella razza bella e bona

che viv in Elicona165
e che gh’han certi nomm tutt in battista,
come sarav a dì mitologista,

classicista, elenista;
l’è lee che manten tutta sta brigada
a furia de piatton de papa fada170

e de robba passada;
l’è lee quella che spianna e slarga e netta
la strada del Parnass al soeu poetta

e je porta in spalletta
al tempi de la gloria come scior,175
dove quand gh’hin se freghen tant tra lor;

infin sta dea d’amor,
per digh chi l’è, l’è la Dea Murcia, ossia
la gran metress de la poltronaria.

Ch’el varda mò Usciuria180
se me pò convegnì de renunzià
a tante comod per andà a cercà

sta rogna de grattà?
Ch’el varda lu se occorr ris’ciagh la pell,
lassà i bej vialon per i stradell,185

sudà comè on porscell,
per vess sicur quand sont rivaa a bottega
de trovagh nanch on asen che me frega?

Nò, nò, no vuj sta bega,
classegh sont e vuj stagh: saront fors’anch190
on cojon, ma on cojon classegh almanch.