LETTERA A LA BARBORIN
Barborin speranza dora,
car amor, bell baciocchoeu,
no vedeva la sant’ora
d’avegh noeuva di fatt toeu.
Finalment quella lumaga5
de quell Peder cavallant
l’è rivaa, che Dio el ghe daga
de penà anca lu oltertant.
Da quell dì che te see andada
a Niguarda col patron,10
sont pur anch staa di or in strada
a specciall sto lizonon!
E ogni voeulta che vedeva
lontan via a comparì
quaj carrell, soo che diseva:15
Franch l’è el Peder! Là: l’è chi...
el stà pocch... el gh’ha tant pass...
oh che cara! L’è vesin...
Me ingurava ch’el sgorass
lu, la mula, el volantin.20
Ma lallela! inanz rivà
ghe né staa della gran luna,
hoo inscì avuu de sospirà
per godella sta fortuna!
Basta: adess cara baciocch25
El begliett l’è chi con mì,
l’hoo leggiuu e basaa a dì pocch
milla voeult, staghela lì!
Di bigliett, varda, n’hoo vist,
n’hoo portaa di milion,30
ma paroll compagn de quist
no s’en scriv nanch daj patron.
Che paroll! Quist sì consolen!
Quist chì sì ch’hin natural!
Hin lì lì proppi che scolen35
giò don coeur s’cett e lejal;
fina là, dove per via
della Togna te moccolet,
Barborin te see ona stria,
te me sponget e consolet.40
Ma voj, varda, stà pur franca,
la pò fann de tucc i stee,
ma la Togna la vuj nanca
caregada de danee.
Sì l’è vera, la me cura45
sul repian quand vegni a cà,
e di voeult anch la procura
de tegnimm lì a cicciarà.
Ma l’è inutel, già, stoo su
che i vesin tel poden dì.50
S’ciavo... allegher, tutt al pù
la saludi e tendi a mì.
E poeù, scolta, el sant Michee
l’è chì arent, ma se te voeu
per mì spazzi anch suj duu pee,55
toeuvi cà magara incoeu.
Chè per mì, se nol fudess
per reson de quel socché...
el sarav lì bella adess...
Ma... t’el vedet nee el perché?60
Brusi anch mì, per dì el coeur giust,
de vegnì alla conclusion,
ché gh’hoo proppi minga gust
de vedett in l’occasion;
ché vuj ben che sti toeu gent65
sien tucc fior de galantomen,
ma hin patron... tì finalment
te set donna, e lor hin omen;
e poeù tì come bagaja
quell dovej mett a dormì,70
scoldà in lecc, vedè in pattaja...
Là: l’è mej pientalla lì.
De maross el gh’è anca el coeugh
ch’el soo ben ch’el dorma nò,
e ch’el coeur el temp e el loeugh75
per friccammela s’el pò.
Sto balloss me l’ha friccada
cont on’oltra adess duu agn,
ma gh’hoo gust ch’el l’ha pientada
e l’ha faa sto bell guadagn.80
Ma la Giulia l’è ona tosa
ch’ha a che fà nagott con tì,
l’è ona matta capriziosa
de stantà a trovà marì.
L’han pientada pù de ses,85
pù de sett e pù de vott,
l’è ona vigna senza sces
ch’ha a che fà con tì nagott.
Tì mò inscambi, el mè baciocch,
te see bona come el pan,90
come on fior spontaa ch’è pocch,
come on dolz de marzapan,
te see limpita de coeur
come on’acqua, come on veder,
ma, voj là! coss’eel ch’el voeur?95
Cossa vegnel a fà el Peder?
L’è già vora d’andà via,
de tornà a Niguarda anmò?
Te saludi anema mia,
voeubbiem ben, che già son tò.100
