Largo largo che passa don Giavan
cont el gran valison di soeu talent,
poffar de bio, pò dass! ma el gh’ha fin dent
el gran secrett de drizzà i gamb ai can!
Alto, presto, a lor sciori a dass de man5
per l’etichetta de rezeviment.
Foeura coeugh, palch, carrocc, appartament
pilla, salamelecch, trusc e baccan!
Don Giavan l’è on omon strasordenari,
l’è el papa del gran tempi de la gloria,10
l’Imperator di articol letterari.
L’è el gran Kan de l’onor, del disonor,
per donna de servizzi el gh’ha l’istoria
e i poster tucc dedree per servitor.
Donca i mee sciori a lor,15
a leccall, a palpall, a morisnall,
a impienill sora tutt e a sagollall
perché nol faga el ciall,
ché dininguarda, Esuss Maria! a nun,
s’el smolla la valis anmò degiun.20
