Poesie (Porta)/36 - El mangià e bev in santa libertaa
 |
Questo testo è completo. | |
Carlo Porta - Poesie (XIX secolo)
36 - El mangià e bev in santa libertaa
| ◄ | 35 - A Caravagg gh'è staa on cert talenton | 37 - ON VISION | ► |
El mangià e bev in santa libertaa
in mezz ai galantomen, ai amis,
in temp d’inverna al cold, al fresch, d’estaa,
diga chi voeur, l’è on gust cont i barbis.
Ma se poeù se ghe gionta el vess trattaa5
a macca, come incoeu dal nost Luvis,
et quidem col quell coeur largh inscì faa,
cossa serva! l’è on gust de paradis.
E el gh’è poeù anch quest de bon, che el Tordorò
sto sò bell paradis el ne le dà10
senza fann romp in prima i ce o cò;
ché a quistall no ghe voeur macerazion
e per godell dadrizz basta domà
mortificass on poo in la colezion.