Poesie (Porta)/31 - Sto bell mas'ciott, sto noster patronscin
 |
Questo testo è completo. | |
Carlo Porta - Poesie (XIX secolo)
31 - Sto bell mas'ciott, sto noster patronscin
| ◄ | 30 - I SETT DESGRAZZI | 32 - Là, piantêla i mee car Filo-fuston | ► |
Sto bell mas’ciott, sto noster patronscin
che stavem tant in ansia de vedè,
sto mas’c profetizaa de Meneghin
giura bacco bacchetta adess mò el gh’è!
Adess mò l’è bell fà a fà l’induvin,5
ché el futur el va via de sò pè
col derivata patris di latin
e cont on poo de regola del trè.
L’è on frutt de bona pianta e l’è sicur
che nol pò reussì che on frutt scialos10
ona voeulta ch’el riva a vess madur.
E el gh’ha poeù anch quest de bon per madurà,
ch’el god lu per el primm i ragg prezios
del bell sô di vertù del sò papà.