Poesie (Porta)/21 - A proposet, Lustrissem, de vaccina
 |
Questo testo è completo. | |
Carlo Porta - Poesie (XIX secolo)
21 - A proposet, Lustrissem, de vaccina
| ◄ | 20 - DESGRAZZI DE GIOVANNIN BONGEE | 22 - Paracar che scappee de Lombardia | ► |
A proposet, Lustrissem, de vaccina,
ch’el senta s’el voeur rid questa che chì,
ch’el sarà on mes che la m’è occorsa a mì
in del fà vaccinà la Barborina.
Gh’eva in cà del dottor ona mammina5
che l’eva in don fastidi de no dì
per sciarnì foeura el sit de fà insedì
i varoeul a ona sova piscinina.
Minga chì, perché chì el dà tropp in l’oeucc,
minga là, perché là se vedarà,10
chì nanch, perché ghe resta el segn di boeucc.
Tira, bestira, on mondo de rason,
fin ch’el medegh, per falla quiettà,
femmegh l’inset, el dis, in suj garon?
Oh che tocch de mincion15
(l’esclama sta sciorina all’improvvista)
suj garon? Giust inscì, pussee anmò in vista!