Poesie (Porta)/19 - PER ONA SCENNA MAL ORGANIZZADA
 |
Questo testo è completo. | |
Carlo Porta - Poesie (XIX secolo)
19 - PER ONA SCENNA MAL ORGANIZZADA
| ◄ | 18 - On villan porch de razza de becchee | 20 - DESGRAZZI DE GIOVANNIN BONGEE | ► |
PER ONA SCENNA MAL ORGANIZZADA
Per burattà se droeuva el buratton,
per pontellà se droeuva di pontij,
per limà e scoppellà, limm e scoppij,
per stangà e bastonà, stangh e baston;
se droeuva per stoppà di stopporon,5
per martellà se droeuva di martij,
per imbrià di brucc se droeuva i brij,
e per scopponà sù, di bon coppon;
per inredà i merlott se droeuva el red,
per sganassà all’ingross di bonn ganass,10
per inspedà polid se droeuva el sped;
ergo donca l’è cossa che la va
soeulia, soeulia, polid e del sò pass,
se droeuven i orghen per organizzà.