Poesie (Porta)/164 - LA COMETTA DEL LUJ 1819 ALLA SURA BIETTA
 |
Questo testo è completo. | |
Carlo Porta - Poesie (XIX secolo)
164 - LA COMETTA DEL LUJ 1819 ALLA SURA BIETTA
| ◄ | 163 - Se no poss - fà quij coss - el mè Togn | 165 - Gent corrii a vedè on pechesc | ► |
LA COMETTA DEL LUJ 1819
ALLA SURA BIETTA
Ah che guaja! che guaja malarbetta
hoo faa, se la savess, con mè marì!
M’è retardaa i mee affari quindes dì,
sicché... la me capiss, sura Bietta!
E saala? Tutt sti guaj per la cometta5
con quella cova che ha faa tant stupì!
E inscì l’è intravegnuu anca all’Amelì,
alla Gina, alla Bina, alla Babetta.
Gh’hin fina tardaa on mes alla Nunziada
che l’è quella giangianna che la sa:10
la varda che cometta sbolgirada!
E nun, la se regorda? stavem là
a rid de quella cova stermenada
e ghe giugavem sotta! Se pò dà?