Nonostant che in sta cà sta sort de sciall
no la sia frutta foeura de stagion
né l’abbia de besogn come cert ball
d’avegh adree on librett de spiegazion,
perché però nessun possa toeù in fall5
la reson de sto gran sorbettonon,
donna Peppa sont chì mì a analizzall,
ossia a mett in ciar i soeu intenzion.
Donca sto gran stracchin che impiss el tond
el significa giust quell prepotent10
ch’el tegneva sott gamba tutt el mond;
quell zuccher, quij pistacch e quij cedraa
e quij spezzi prezios ch’el gh’ha de dent
voeuren dì el bell e el bon che l’ha raspaa.
Quel frecc, quell costippaa15
significhen i sgrisor di familli,
di pà, di mamm, di gent miss in scompilli
da quell fior de besbili,
e nun che semm chì intorna coj cuggiaa
semm la figura di coalizaa20
che infin l’han deslenguaa:
lee, donna Peppa, che la paga i spes,
lee per esempi la pò vess l’Ingles:
el pò vess l’Ongares
l’avvocatt sò fradell, che in quant onor25
franchezza e fedeltaa l’è inguaa de lor;
el pader cercador
el pò scusà per el Napolitan
ch’el menna i ciapp per guadagnass el pan.
L’ingegnee Marian30
col Lombardia, maester de volgar,
vun Saxen Cotha, l’olter Sax Weimar;
don Carlo, ex regolar,
e la Teresa hin quij del gran Fedrigh,
che parlen franco e no ghe importa on figh.35
Ghe lassi mò l’intrigh
ai trii Boss, ai Maran, e a quij che vanza
de sciarniss foeura la rappresentanza,
pur ch’abben la creanza
che ghe lassen vanzà per el poetta40
quella del Russo della perteghetta.
