Sont staa in lecc des dì filaa
con la gotta in tutt duu i pee,
hoo traa sguagn, hoo bestemmaa
per dò milla carrocciee.
Gh’eva i did besinfi e gross5
che pareven tanc bojocch,
e on dolor dent per i oss,
on dolor, t’el digh mì Rocch!
Gh’eva i ong di duu didon
foeura affacc de simetria,10
destaccaa ai quatter canton
asquas lì de boffà via,
e la pell rossa infogada
come i facc di brentador
l’eva asquas pussee tirada15
che né quella di tambor.
Sott aj ong, sott alla pell,
gh’eva picch perzipitos
e ghe n’eva quell sfrasgell
che gh’è in Domm a Santa Cros.20
Me n’han daa pur anch di strocc
sti picasc fioeuj becchi etzettera,
m’han tegnuu trii dì e trè nocc
dessedaa pesc che alla lettera.
E in sto temp, de stell visibel25
piscininn mezzann e grand
n’hoo vist propri l’impossibel,
fors al trippi de Lalland.
E anch sto trippi el redobbiava
al pù piccol di frecass,30
tant che a ognun che starnudava
ghe ingurava ch’el crepass.
Di campann, de chi je sonna,
de chi ordenna de sonà
ho ditt robba bolgironna:35
bon che el ciel no el m’ha daa a trà.
Se de nò ceregh segrista
campanatt pret fraa novizzi
creppen tucc all’improvista
senza on can de fagh l’offizzi.40
A sforziori adess podii
figurav quanti torment
quand spasem hoo soffrii
malappenna strusamm dent.
Basta dì che trii dì e pù45
sont staa fermo all’istess post,
sfondaa in lecc, senza fall sù,
che Dio guarda me fuss most!
I deliqui, i convulsion
me ciappaven senza requi,50
sont rivaa a fà compassion
fina a on pret che viv d’esequi.
De maross poeù m’è toccaa,
per avegh torbed i orinn,
de famm pioeuv in sul bagnaa55
col pippamm di medesinn.
Quist per mì han faa on vaga el rest
col sò influss semper maledegh;
j’hoo faa ciar, ma gnanch par quest
hoo possuu avè in cul el medegh.60
L’appettit l’eva andaa a spass
e quij duu, quij trii suppin,
che ogni dì me strangojass
even tanc prej de molin.
