Apri il menu principale
Il bov de Lavaz

../25 ../ IncludiIntestazione 26 febbraio 2016 50% Da definire

25 Poesias (Nay)

Il bov de Lavaz

La detga nus raquenta
D' in pur zun lavigiau,
D' in gron ranver e lader,
Crudeivel, zanistrau.
5 Ses tats e tattas vevan
Bia rauba gia raffau,
E lur beadi quella
Cun forza recuvrau.
Ils Medelins havev' el
10 El cudisch dil sgurdin,
Purtavan lur culengia
Il di de Sogn Martin.
La rauba schendra tema.
Fa' l lader reverius,
15 Fa trer il pur capetscha
Von il signur, ch' ei crius.
Smarvegl, sche nies raffader
Haveva sin cumin
Il pugn e la vuschada
20 De mintga Medelin.
Fatschentas, ugadias
Schischevan en siu maun;
Al pauper sut las unglas
Tschitschav' el or il saun.
25 Sin tuma bein postada,
Si Medel ella val,
Salzava sia casa,
Ses beins spel lartg vial.
Aunc ina pintga tenda
30 Duvrav' el per runda
Si' acla situada
A Platta el valâ.
La tenda era tschespet
D' in orfan ugadau,
35 Che steva sut bitgetta
… De nies ranver famau.
Vonzei gl' ugau pretenda
Migeivel e bufatg
La penda confinonta
40 Per vegl ed agen fatg.
Disgend allur la buna,
Sto ei vegnir dertgau.
L' uatgia prest compara
Sper l' acla sin il prau.
45 Gl' engiramen decida
La lutga dil pupratsch
Von Diu, von sogns ed aunghels,
Ch' el stetti sin siu tratsch.
Malign havev' il schani
50 Mess tiara els calzers,
Che era recaltgada
Zerclond ses agiens êrs.
Mortals sas cun malezia
Maneivel enganar:
55 Il vegl, suprem derschader
Selai ca cuglienar.
Mo, cur che l' ur' arriva
De tut stuer bandunar,
E cur che l' ura suna:
60 „Gl' ei uss de ricla far,“
Ritscheiv' el bein la hostia,
Mo zuppa siu puccau,
Commett' in sacrilegi
E rest' in um stinau.

  • * *

65 E sin la fossa frestga
Sgargneva, cavistraus,
In quac sc' in miserere
Pil pauper leu satraus.
Pil pauper, che haveva
70 En fossa gnanc ruaus,
Da stgira notg sguschava
Cun glisch entuorn ses praus.
Sesend sil mir sonteri,
Fageva leu ramur —
75 Disgrazia pil caluster
E pil caplon sgarschur. —
En casa de Sogn Plazi
Viveva da quels onns
En sontgadat in pader
80 Sco resdan perdavons.
Il pader cun pussonza,
Cun riuc zun vigurus,
Gudeva plein fidonza
Dal pievel devozius.
85 A Platta sil sonteri
Hal ina notg vigliau,
Urau las litanias,
Il vierv, sco commandau,
Naven da lezza sera
90 Ei tut berlot svanius,
Il quac, che leu sgargneva,
Ei staus schizun stulius.
Ed ella val de Medel
Fladava tut cuntent,
95 Per grazia de Sogn Placi,
Agit dil Tutpussent.
Vegnend la primavera
Cun tschenghels verds, fluri
Pertgiran mats de Medel
100 Lur muvels spel Scopi.
Giu funs la val de Lavaz
Enqueran ei schurmetg
La stad, ils dis che scauldan,
En cauma sil vadretg.
105 Mo cul fagugn scadeina
E sburfla tras la val,
E cul vadretg scuflenta
Las auas digl ual,
Lu bergl' a funs el venter
110 Dil glatsch, ch' ei fa sgarschur
In bov, scols pasters resdan,
Snuezi al pastur.
Quei ei il bov de Lavaz,
Dal pader scungeraus,
115 Che el vadretg perpeten
Endira cadenaus. —