Poesias (M. Nay)/Mesanotg sin il plaun de Cons
 |
Questo testo è da formattare. | |
| ◄ | Poesias | Poesias | ► |
Mesanotg sin il plaun de Cons.
(Nach Igl Ischi, S. 199, 1915. )
Dudisch ga solem resuna
Dalla tuor la vusch dil zenn:
E da quolms e valls rampluna
Anavos il tun muren.
5 Pli bufatg il Rein ramura
Per tedlar quei sun tremblont.
Da S. Gion sur la planura
Va in schèm nocturn pliront.
E la glina sestgirenta
10 Sur las tschemas dil Badus.
Igl uaul bufatg lamenta
En siu mied misterius.
Cheu s' arvan las fossas; il griu dell' uiara
Restrembla dals quolms oragiu ella tiara.
15 Cun pals e turschets e cun fisis armai
Seraspan ils Grischs ord lur fossa clamai.
Cun plagas horriblas, aveinas spinadas,
Igl egl moribund en las fatschas smidadas,
Bandunan las roschas perpeten ruaus
20 Per spert serimnar sil clamar de lur caus.
Amitgs, inimitgs sepostan sepeinan,
Ils caus sescutinan, cusseglian, ordeinan,
E gleiti ei prompta la nera armada
Tut spetga sil segn per taccar la lutgada.
25 Ils schumbers ramplunan. Fraccass de canuns,
Commandos franzos, grius dils Grischuns,
Rueida ded armas e schems de sgarschur,
Fridas de mort e cloms plein dolur.
Ils umens dils quolms cun frida gagliarda
30 Sentir 'gl inimitg fan vigur montagnarda.
Els sdreinan afuns 'gl adversari raffont
E cloman victoria las armas smanond. —
Sgarscheivla s' avonza la dira battaglia
Da Cons a Mustér en la nera stgiraglia.
35 Bum! resun' il zenn profund
Dalla tuor tiel moribund. —
Ils herox de ferma possa
Tuornan giu en freida fossa.
Ed il Rein bufatg sgarguglia
40 Tras la greppa, sur carpuglia
E si' unda bass murmura
E raquent' enqual bravura,
E 'gl uaul leu sin la spunda
Bein bufatg al Rein rispunda,
45 Ed igl aur de glina pleina
Glischa tras la notg sereina.