Poesias (Disch)/5
 |
Questo testo è incompleto. | |
| ◄ | 4 | 6 | ► |
Il mat els curonta.
Jeu stun uss cheu sc' in vegl cavriu
Cun roma penderlida,
Jeu sun vignius in engurgniu
D' urdida tarladida.
5 Nuot ei sco sauda, nuot endrètg
Jeu sun en grett' adina
E quel che passa sut miu tètg,
Quel scapa cun furtina.
Jeu sundel ditg staus pupergnaus
10 Da mia buna mumma,
Da frars e soras a quinaus,
Da tut il mund insumma. …
Da las matauns sun sefutraus
In quex de finadina
15 Ed uss persuls e bandonaus
Survegn jeu franc buc ina.
Schiglioc pilvér vess jeu bugien,
Sch' jeu survignessel ina
Che fuss a miu talien e senn
20 Carina caserina.
Mo in mat vegl ha gron stermen,
Studeg' e ponderescha
Avon che far il sprun lien
E fa negina prescha.
25 La Tina fuss bufatga fétg
Plaschess a mi de fatscha;
Mo sch' ei la par' ei, sco' i vegn detg,
Ton paupra, la pupratscha.
E la Turtè quei bi affon
30 Vess rauba detg avunda;
Sche sei il tissi il pli gron
Chei cheu en tut la runda.
D' in autra vess jeu bien talien,
Sch' eis ella malsanetscha
35 Ed ei malgrad ch' ell' ha tut bien
Pallida e putretscha.
La Rosa fuss grad sco in meil
Rodunda, grass' e bialla;
… Sche ha la memia tgetschen peil
40 E memia bia favialla.
E la Balugna stoss jeu dir
Fuss tgeua e pulita;
Mo sco jeu hai podiu sentir,
Seig' ella cut' e trita.
45 E l' Ita ch' jeu vess schi bugen,
Che ha negina menda,
Ha sias juas sisuren;
Leu, Toni, gnanc sestenda.
Aschia sei, jeu ditg a vus,
50 In crutsch tier finadina.
Jeu ditgel quei mo denter nus.
Sche sche, sche sche adina.
Ti has schi ditg de ponderar
Che ti finfatg aunc spondas,
55 Cun tiu studiar, cun tiu striblar
La broda tier las ondas.
E tutas laian tei sufflar
La stialla ord la splauna
E tia veta sas ti far
60 Igl eremit en tauna.
Ed il davos vegns vivs magliaus
Da nauscha vermeneglia;
Quei ei la sort de tuts mats blaus
Ch' han piars la buna veglia.
65 Perquei, miu mat, marida baul,
Pren tia carezada.
Ti stos pitgar il fier schi caul
Ch' el sbrenzli en flimmada.
… … …