Poesias (Disch)/3
 |
Questo testo è incompleto. | |
| ◄ | 2 | 4 | ► |
Sill' alp.
(Nach Annalas, S. 146, 1911.)
Sill' alp sut la greppa hai jeu miu deletg,
Jeu vivel e regel leu grad sco in retg.
Paschentel las cauras cun iva e muot,
L' entira vallada encresch' a mi nuot.
5 Duront che brentina seruschn' ella val,
Duront ch' ell umbriva sezuppa il mal;
Resplenda la pezza egl aur dil solegl
Che ves' en ventira mei tard e marvegl.
Jeu contel e sunel la tiba tudi,
10 Che tutta la greppa rebatt' en rudi.
Schegie mo en lumpas in pauper pastur,
Bratass jeu per bia buc cun mintga signur.
La sera en fecler gid' jeu miu signun,
Survegnel persuenter brav penn e tschagrun.
15 En treglia durmin nus in dulsch bien ruaus,
Schegie ch' ils lufts schulan entuorn ils nos tgaus.
Sill' aulta montogna, grad sut il parvis
Gaud' jeu en ventira ils mes pli bials dis.
Jeu quetel ch' jeu vesi tral tschiel clar steiliu
20 En gronda bellezia sur mei il miu Diu.
Lu rogh' jeu et urel cun gronda fervur:
O bab mira giu sin in pauper pastur!
Schurmeg' e protegia 'von prighel e don
Miu tgierp e mi' olma, jeu sun tiu affon!