Poesias (Cloetta)/2
 |
Questo testo è incompleto. | |
| ◄ | Poesias | Poesias | ► |
2. La püpa ruotta.
La sort m'avaiva regalà
Ün bun e char ami.
O quant ch'eu eira fortünà,
Ün rai non ais dapü!
D'sa amicizi' eternità
Sovent el am güret,
E sco ün segn da fideltà
'na püp' am regalet.
E quant sovent ch'eu per fümar
La püpa laiva tour.
Eu d'el solaiva'm regordar
Con emoziun nel cour.
Ün di darcho la pigliet nan,
Que eir' ün di festal;
E qua ma püp' am det our d'man
E get in tocs. Fatal!
'na frizza tras il cour passet —
O güda'm, Segner bun
Ma fermamaing il cheu squasset:
Que ais superstiziun
Ün temp davo il he eu vis,
Currit a'l salüdar — — — —
Ma fraid, sco sch'eu tuot ester'l füss
S'mettet el a tschantschar — — —
Qua mia püp' am vain imaint
E libramaing confess:
Sch'eu qui l'avess in quist momaint,
Pür uoss' eu la sfrachess
9. Marz 1907.