Poesias (Carnot)/10
 |
Questo testo è incompleto. | |
| ◄ | 9 | 11 | ► |
Il davos di dil caplon Condrau.
(Nach Gasetta Romontscha, Nr. 16, 1899.)
Cun l' alv' ei a Rueras oz glisch el sanctuar,
Gia sbrinzlan las fanestras, candeilas ardan clar.
Il pievel oz serimna cun prescha beinmarvegl,
Avon ch' ils quolms terlischan els radis dil solegl.
5 Co statan en schenuglias, urond, bargiend els bauns,
Las giuvnas tujetschinas, las rietschas de dunauns!
Lur vestas ein oz alvas, ils mauns aschi tremblonts,
E cun lur mummas bragian sin bratsch ils pigns affons.
Odem baselgia statan ils umens en rudi
10 Cun fatschas anguschusas dil giuvenessendi.
Entuorn entuorn baselgia formeschan ina seif
Turschets e buis e spadas plontadas ella neiv.
Tadlei! Il zenn semova, el tucca cun fracass,
Baul tucca sco de stuornas e baul sco sch' el plirass.
15 Snavur il pievel carga, el crei tut tementaus,
Ch' il di dellas posaunas per el sei arrivaus.
Uss pass' ord il teschamber Sur Giachen, il caplon,
Ad el cun rassas cotschnas dus buobs van ordavon.
Igl um de fier e possa, — oz eis el sco sfraccaus,
20 Siu egl, de fiuc antruras, cun larmas ei bognaus.
La sontga Mess' entscheiva. Il venerabel um
Di oz cun vusch tremblonta: Dominus vobiscum!
Mo quella lunsch retuna, sco sch' ella less curnar:
Ils lufs entuorn las nuorsas entscheivan ad urlar.
25 Finid' ei uss la Messa, il carezau caplon
Sevolva tier siu pievel: „Oz vegn il luf scarpon:
O cars, surdei las olmas al Bab en tschiel leusi!
Aunc oz miu pievel vesel, aunc oz e mai na pli.
Il Segner tei pertgiri, Tujetsch, o cara vall,
30 Cu fem e flommas spidan las buccas de metall!
Ils mirs de nossas casas, quels vegnan oz stremblir,
La neiv e — l' innocenza oz vegnan secotschnir.
Jeu vi bugient cuvierer la vall oz cun miu maun,
Jeu vi bugient oz sponder per vus miu agien saun!“
35 Il bien caplon retuorna cun larmas giud 'gl altar,
Tuts pliran sco ils orfans, che ston il bab satrar.
En buca ditg giud plauncas ramplunan ils canuns,
Atras la neiv serunan ils jasters battagliuns.
Cun rabia sedefenda il pievel de Tujetsch,
40 La neiv vegn oz bognada da tgietschen suadetsch.
Per nuot! — La petschna roscha untgir sto anavos,
Sco ina bova vegnan ils grenadiers franzos.
Cheu passa von l' armada il majestus caplon,
El vul spindrar la giuvna, il vegl ed igl affon.
45 El stat avon las rietschas, el clom' alzond siu bratsch:
„Quel, ch' ei leusi, defendi nies car e sogn terratsch!“
O audas, tgei canera! In rosch dils furibunds
Sin il caplon sederscha, ch' el dat sfraccaus a funs.
El schai en saun e plagas, el aulz' igl egl murent,
50 Il fleivel maun el aulza en siu davos moment.
El vul, avon ch' el sparti, la vall aunc benedir,
Per quels ch' el ditg viveva, per quels vul el murir.
La sera bragi' il pievel rimnaus el sanctuar,
El mira sin la bara tschentada von gl' altar.
55 Cheu di in um: „Sur Giachen en tschiel ei glorius,
El viv' e vegn a viver adina denter nus!“