Poesias (Camathias)/1
 |
Questo testo è incompleto. | |
| ◄ | Poesias | 2 | ► |
La buola ded alp.
Osut in grep en la pistira
Giudem in' alp in' aua nescha:
Fontauna frestga ord mesira,
Carschun stgirverda leu flurescha.
5 Digl ault glatscher ell' ei la feglia,
La buola de naschientsch' alpina;
La giuvna legramein surseglia
Ils urs de crap de sia tgina.
La matta ord il quolm siglida
10 Lai spèrt plascher la patria nova,
Siu égl gl' emprem il tschiel salida,
Avon che ir sur grep e bova.
Salida cun égl clar la spunda,
Gl' uaul de pégns, che lunsch serasa,
15 Ils vitgs giu ella val profunda,
Ils quolms dil Matg, ils praus de casa.
Sun sefermaus sper quella buola,
Hai plidentau la viandonta.
Mo ell' ha prescha, ei de fuola,
20 Entscheiv' il tur el mund e conta:
„Il Segner ha mei mess sin via
E dau el cor grond desideri:
Sai buca star de compagnia,
Pér en la mar jeu pos star eri.“