Poesias (A.T. Tuor)/4
 |
Questo testo è da formattare. | |
| ◄ | 3 | 5 | ► |
Las hirondellas.
L' emprema neiv ei oz curdada,
Sur ura, ditg e bein,
E plaun e plaun ei setschentada
Da sum entochen Rein.
5 L' uolp sezuppa spert en tauna,
Ils muvels van sut tetg,
Ils tschutts cuviera caulda launa,
La lieur' anfl' in schurmetg.
En l' aria sgolan hirondellas
10 Girond ad in girar,
E secusseglian denter ellas,
Tgei ch' ellas deigien far.
Las grondas fuvan cheu vegnidas
Per passentar la stad;
15 Las pintgas, péra cheu naschidas,
Han oz gl' emprem combat.
Las grondas vevan tontas gadas
Cun ellas discurriu,
Ch' ei detti sper la mar contradas,
20 Che neiv mai hagien viu.
En quort serimnan en murighels
E sgolan en carauns,
Per enzaco mitschar dals prighels
Che fugan sin tuts mauns.
25 O hirondella, tgei pitgiras
Stoss questa notg suffrir;
Da fom, da freid, las peinas piras,
Stoss malamein pirir.
Ord tuttas enconuschel ina,
30 Che va da nossa vall,
Ed oz banduna per adina
Gl' igniv sut miu tetgal.
Amitga digl carstgaun, ti cara,
Utschi che porta cletg,
35 Cu l' alva la damaun compara,
Ha tei la neiv cuvretg.
E forsa da solegl sclaridas
Has viu cun egl murend
Las tiaras dellas piramidas
40 El spért aunc in moment.