Pagina:Vital - Chanzuns popularas ladinas.djvu/2

Chanzuns popularas ladinas

Introducziun.

Continuand la publicaziun da chanzuns popularas ladinas¹, preschaint eu quaista vouta als lecturs dellas Annalas üna collecziun tuot speciala. Eir nellas collecziuns publichadas fin uossa as chattan vienan chanzuns d’auturs contschaints, schi dafatta chanzuns tuttas our da cudeschs stampats; la granda part pero ais da derivanza incontschainta, fluors, chi flureschau nel giardin poetic da nos pövel, sainza chi vegna in immaint a qualchün, da domandar, chi chi las ha implantadas. Quaista vouta ais que otramaing. La part essenziala della publicaziun, cioè las prümas quaranta chanzuns, derivan tuottas d’ün autur cognoschü, derivan tuottas da nos poet Gian Battista Sandri, chi figüra in testa da quaista annada con portret e biografia. Plüssas da quaistas chanzuns — eu admet que — non appartgnessan strictamaing in nossa collecziun. Ma ellas servan tant bain a dar ün retrat dels costüms e del möd da viver da nos pövel; ellas reprodüan tant bain la lingua, ils impissamaints e sentimaints da nos pövel, ch’eu non m’ha podü resolver da far üna schelta plü rigurusa. Eir a quels, chi vöglian stüdgiar il caracter della poesia da Sandri sarà que aggradi, e per quaists specialmaing aggiundsch eu amo ün pitschen register dad otras poesias da Sandri, chi füttan stampadas fiugià plü bod nellas collecziuns da poesias popularas. Que sun las seguaintas:

1. Vide Annalas XI 161-224, XII 245-321 e XIV 201-280.