 |
Questa pagina è stata trascritta e formattata, ma deve essere riletta. | |
| 90 | pcapita xcvii-c |
CAPUT XCVII
PRIMA ORIGINARIA IURIUM ACQUISITIO
Atque haec auctoritas, de qua hactenus disseruimus, est prima originaria omnium omnino iurium acquisitio, quam, quia cum hominibus nata est, possis appellare «cognatam» vel «nativam».
CAPUT XCVIII
DE AUCTORITATE MONASTICA
Primam vero iuris auctoritatem licet appellare «monasticam» seu «solitariam», quam homines in solitudine habent. «Solitudinem» heic accipio loca aeque celebrata ac deserta: modo ibi homo, in vita impetitus, legum praesidium implorare non possit, ita ut ei eo temporis articulo respublica nulla sit. Quod Cicero sic graviter explicat: «Ante ei iniusta poena luenda sit quam iusta repetenda».
CAPUT XCIX
AUCTORITATE MONASTICA HOMO IN SOLITUDINE SUMMUS
Atque ex hac auctoritate monastica homo in solitudine summus est: eaque iniustum aggressorem ob sui praestantioris hominis tutelam, quia aggressori iustitia praestat, iure superiori occidit.
CAPUT C
DE IURE MAIORUM GENTIUM
Iuris gentium defínitio — «Historia» quid?
[1] Ex hac tutela naturae praestantioris natum est ius gentium, quod definire possis «ius violentiae». Et, ut in hominis vita ius omnium primum tutela existit, ita in vita generis humani, quae historia est, ius gentium, quod tutela totum constat, primum omnium ortum habuit.
