 |
Questa pagina è stata trascritta e formattata, ma deve essere riletta. | |
| favola terza | 233 |
comenzá vilanizá. Ser Zambô, che se sentí tocá in sü l’onôr, la comenzá travasá co i pugn de bé in mèi, talmentre che in fí la povrèta(68) convegní aví pacenza. Essend za trapassat ol cald e sovrazont ol fred, madona Felicèta domandá a ser Zambô una födra de seda da covrí la so peliza, per che l’era mal condizionada; e per che ol fos cert che la fos strazada, ol ghe la(69) portá a mostrá. Ma ser Zambô no ’s curá de vedí-la, ma ’l ghe respòs che la la conzas e che la la portas ixí, che da ca soa no s’usava tanti pompi. Madona Felicèta, sentendo tai parôi, se dosdegná(70) fortement e dis ch ’a ’l la voleva in ogni muód. Ma ser Zambô ghe respondiva che la dovis tasí e che no ’l(71) fès andá in colera, chè sarèf mal per lé, e che no-g la voliva fá. E madona Felicèta instigandôl che la voleva che ’l ghe la fès, l’ü e l’alter intrá in tanta furia de colera, che i no-g vedeva de i öc⸍c⸍. Ma ser Zambô, segond la so usanza con ü bastô la comenzá tamussá e fag⸍ una peliza de tanti bastonadi, quanti la ne pos mai portá; e la lassá quasi(72) per morta. Vedend madona Felicèta l’animo de ser Zambô inversiat contra de lé, con alta vôs la comenzá maledí e biastemá ol dí e l’ôra che mai se n’è parlá e chi la consegiá che la ’l tolès mai per marit, digand: — A sto muód(73), poltrô, ingrat, ribald, manegold, giot e scelerat; quest’è ol premi e ol guidardô che te-m rendi dol benefici che t’ho fag⸍, chè, de me vil famèi che t’eri, t’ho mi fag⸍ parô non solament de la roba, ma ancora de la propia mia persona? e ti a sto muód me trati? Tas, traditôr; chè a ogni muôd a te n’empagherô. — Ser Zambô, sentend che madona Felicèta cresceva e moltiplicava in parôi, te la giocava süs al bèl polit. L’era vegnüda a tant madona Felicèta, che, com la sentiva che ser Zambô parlava o se moviva, la tremava com fa la fôia al vent, e se ’s pissava e cagava sot d’angossa.
Pasada che fo l’invernada e vegnüd l’instad, l’acadè a ser Zambô de andá per certi so fazendi e per scodí certa quantitá de denér da debitori de la botiga a Bologna, e ghe convegniva stá assé zornadi; e dis a madona Felicèta: — Felicèta, te fo a saví c’ho mi do fradèi, tug⸍ do gobi com a’
