 |
Questa pagina è ancora da trascrivere o è incompleta. | |
Ma ovej lá! giust mò lu/sur Perell,
Sciá on bon fiaa de vinett, ma de quell
Savorii, limped, luster e s’cett
Che se catta sui ronch del Gergnett1.
Con sto scabbi, che in poni de lejal
L’è el retratt del nost coeur tal e qual,
Gh’hoo intenzion — de intona ona canzon
In onor de la nostra Patrona
Che poeú infin se l’è bella, l’è bona,
Se l’è dolza, graziosa — e giusosa2,
Foo el me cunt che l’è on rasoi3 anch lee
D’ona vit — ben scernida — e scialosa,
Insedida4 — e cressuda in sto sit.
Grazia a l’aria e a l’influss del Verzee5,
Sciá — manch ciaccer, vint, trenta carafi!
Paghi mi — chi voeur bev vegna chi.
Chi voeur bey, presto chi — paghi mi.
Creppa, s’cioppa in sto di — l’avarizia,
E che viva la pas, l’amicizia.
Alto andemm —
Su sbragemm — su cantemm,
Che la sòlfa l’è questa che chi,
Alto lá! intòni mi — citto lí.
Viva, viva la nostra Patrona,
Buseccona
Tant lee, come nun.
Che intuitú
De bellezza e virtú
Per brio bacco le zed a nissun!
St’anemina del ciel delicada,
Destinada
A sta ai fianch del patron,
L’è el retratt
De la Pas che l’è in att
De fa a sciosc6 con la giusta reson.
- ↑ Gergnett: Gernetto, presso Monza, villa allora del Conte Mellerio. (Nota transclusa da pagina 350)
- ↑ giusosa: succosa. (Nota transclusa da pagina 350)
- ↑ rasoi: magliolo, sarmento da innestare (insedi). (Nota transclusa da pagina 350)
- ↑ insedida: innestata (qui in senso metaforico). (Nota transclusa da pagina 350)
- ↑ influss del Verzee : influsso milanese, perchè nata nel palazzo reale di Milano. (Nota transclusa da pagina 350)
- ↑ fa a sciosc: fare a soccida. (Nota transclusa da pagina 350)
