Pagina:Pitrè - Canti popolari siciliani I, 1891.djvu/350

324

CANTI POPOLARI

*

370. Cu’ perdi amici, cu’ perdi parenti,
Quantu è cchiù amaru cu’ perdi ’n’amanti!
Cu’ la perdi di morti nun è nenti,
Ch’ a longhi tempi passanu li chianti.
Nun è chissa la pena chi si senti:
L’amanti è viva e mi passa davanti.
(Casteltermini).

*

371. Mi firisti lu cori c’un picuni,
E pri ’n eternu nu lu pô’ sanari;
Sempri häi statu un cori tradituri,
E chissa cosa nun la pôi nigari;
Laida, chi tradisti lu tò amuri:
E comu ti lu pôi diminticari!
Ora chi t’addunasti di l’erruri,
Ora chi tu mi vô’, nun hai chi fari.
(Casteltermini).

*

372. Quannu passu di ccà, nun t’ammucciari,
Tu ti cridennu chi passu pri tia:
Passu pirchì su’ solitu passari.
Ma drittu pigliu pr’ ’un sgarrari via¹.
Mmalidittu la robba e li dinari,
Ca d’oru fussi nun t’anninghiria²;
Maritati si- ti vô’ maritari,
Spiranza ’un stari cchiù supra di mia.
(Alimena).

1. Ma vo diritto per non isbagliare la via.
2. Che se tu fossi d’oro, io non vorrei toccarti, non vorrei menomamente accettar nulla da te.