 |
Questa pagina è stata trascritta e formattata, ma deve essere riletta. | |
| ABBANDONO, SVENTURA, MORTE | 323 |
*
367. Vurria firriari l’universu,
Di punta ’n punta cu lu miu cumpassu;
Avia ’n’amanti bella e l’hagghiu persu,
E l’hagghiu persu ’nta paisi arrassu.
È tantu tempu ca cci vagghiu appressu,
Tuttu mi sentu cunsumatu ed arsu;
Sugnu comu ’na navi di traversu,
Persi l’amanti mia, persi lu spassu. (Noto).
*
368. Si mortu tu mi vôi fammi ’na fossa,
Mi cci vòrvichi jintra e ti nni vai;
All’ottu jorna poi cci torni apposta,
Tu spinci la balata e truvirai...
E di la carni mia nni trovi l’ossa,
Fattinni un paru ’i rari1 e juchirai;.
Si alcunu ti nni spija di cu’ su l’ossa,
— Di l’amanti fidili chi lassai. (Termini).
*
369. O cara amanti, scavami ’na fossa,
Ddrivacamìcci dintra, e poi vattinni;
E ddoppu l’annu dùnacci ’na smossa,
Vidi a chi sugnu juntu e prejatinni.
Carni nun cci nn’è cchiù supra di l’ossa,
Fatti un paru d’ali, e jocatilli.
A cu’ po’ ti dumanna, dicci: — Ss’ossa
Su’ di lu primu ca ’n vrazza mi tinni.
(Caltavuturo)2.
