Pagina:Pitrè - Canti popolari siciliani I, 1891.djvu/340

314

CANTI POPOLARI

*

342. Bedda, quannu di tia m’alluntanai,
Ciancivi ’na simana e forsi cchiui:
E non cci curpu iu ca ti lassai,
Cci curpa cui nni voli mali a nui:
E pòzzinu patiri peni e guai
Cui fici fari sta partenza a nui:
Munti ccu munti non si junci mai,
Speru ca m’haju a junciri ccu vui. (Catania).

*

343. Parti suspiru mè, parti e camina,
Tu parti, e non pusari a nudda banna;
Si cc’è quarcunu ca ti scontra e spija,
Non diri nè cu’ si’, nè cu’ ti manna.
Vai unni dda rosa lisciandrina,
Chidda ca teni ’ncatinata st’arma;
Cci di’ ca cianciu di sira e matina,
Su’ comu ’n urfaneddu senza mamma. (Patti).

*

344. Stiddi pianeti chi all’aria jiti,
Chi nova di l’amanti mi purtati?
E vui giuijdda¹, chi luntana siti,
Scriviti a manu², e diti comu stati.
Vüi la notti ’n sonnu mi viniti,
E ’ntra lu propria sonnu mi parrati;
Poi la matina quannu vi nni jiti
Chi pena ’ntra lu cori mi lassati!... (Cefalù).

1. Giuijdda e giuitta, dim. di gioja.
2. A manu, di propria mano.