Questa pagina è stata trascritta e formattata, ma deve essere riletta. |
240 | CANTI POPOLARI |
Aviti ’na batissa tanta ’ngrata,
Ca nun vi fa affacciari nudda vota;
Fìnciti foddi, e finciti malata,
O puru ca lu sènziu ti vôta;
Cà quantu va ’na sira maritata,
Mancu cci va cent’anni batiota. (Palermo).
*
155. Bella, pr’amari a vu’ ’mpignavu a tanti,
’Mpignavu amici, ’mpignavu parienti,
Ancora fici lu vutu a li Santi
Pr’avìrivi pri spusa sulamenti.
Arsira cci passavu ccà davanti,
Idda mi vitti e nun mi dissi nenti;
Mà soggira mi dissi: — Passa avanti:.
Vàsala, prejatinni1 e ’un diri nenti2. (Casteltermini).
*
156. Mi nn’haju a jiri a stari a Magnavita
Dunn’è la tò biddizza nutricata.
Fusti 'nfasciata ’ntra fasci di sita,
E ’ntra un vacili d’oru vattiata.
Tu si comu ’na rosa culurita,
Chi notti e jornu è russa e ’mmuttunata.
Tajati3 quantu è bedda la mè zita,
Ch'è comu ’na ninfa quannu è armataǃ (Alcamo).