 |
Questa pagina è stata trascritta e formattata, ma deve essere riletta. | |
| AMORE, BACI | 233 |
*
135. Ti vogghiu beni assai, ti vogghiu beni,
T’amanu l’ossa mei e li me’ vini;
O Gesu! tant'amuri d’unni veni,
Ca tu mi pari bedda senza fini!
Un’ura ch’ ’un ti viju patìsciu peni,
Mi veni ’n allammicu di muriri...
Nun sàcciu chi cos’è chi mi tratteni
Ch’appressu nun ti vegnu unni camini. (Palermo).
*
136. Iu tegnu un chiovu 'n pettu fattu a viti,
Lu cchiù duluri è quannu gira e vòta;
Tant’è forti l’amuri ca tiniti,
Ca l'omu lu tirati a pocu a pocu!
La genti ca mi spijanu chi aviti,
Mi fannu arrinnuvari lu mè focu.
O mi diciti sì, o no diciti,
Stari nun pozzu cchiù ’nta chistu locu. (Alimena)
*
137. Quannu io passu di sta strata d’oru,
Lu pedi s’addummisci e nun va avanti;
Io viju a la me Ddia un pezzu d’oru,
Li capidduzzi so' tutti damanti.
E l'ancileddi chi cantanu a coru,
Viju lu paraddisu cu li Santi;
Bella, ti pô’ chiamari gran tisoru,
Arvulu carricatu di damanti. (Palermo).
*
138. Finestra d’una cammara crudili,
Quantu suspiri m’ha’ fattu jittari!
