Pagina:Pitrè - Canti popolari siciliani I, 1891.djvu/258

232

CANTI POPOLARI

Bedda, p’amari a tia nun haju abbentu¹,
Macari² a diritillu mi nn’affruntu;
Di tia nn’aspettu novu sintimentu:
Si mi dici di sì, vegnu a lu puntu. (Palermo).

*

133. — Amuri, amuri³, mettiti ’n caminu,
Ed iu videmmu⁴ caminu ccu tia;
'N vistiteddu ti fazzu domaschinu,
Ca pari un giuvineddu comu mia.
— Quannu arrivamu ddà, comu facimu?
— Apru lu pettu miu, cci mettu a tia.
— Ed a li genti comu cci dicimu?
— Ca semu dui fratuzzi a la strania. (Adernò).

*

134. Io m’allammicu,⁵ e vu’ ’un v’allammicati;
Comu di la gran pena ’un ni muriti!
Li mura su’ di brunzu fabbricati,
Li porti su’ di ferru e vui l’apriti.
Pi nun aviri ’na cummuditati,
’Nta l’acqua sugnu e moru di la siti.
Longhi li jorna e curti li nuttati
È chiddu chi addisianu li ziti⁶. (Palermo).

1. Abbentu, quiete, riposo.
2. Macari, anche, perfino.
3. Amuri, qui è l’amata, con la quale lo amante fugge travestendola da uomo.
4. Videmmu, pure, altresì.
5. Vedi la nota 2 di p. 223.
6. Per potere stare insieme lungamente e frequentemente.