- Ocio ai pize che i no obedisce ai so jenitore e i sin va de ciasa par
stico. Ra no i ’siara mai polito inze sto mondo, e un di o l outro i se
ciamara grame de chel che i a fato.
- Cianta, cianta soutaruco, ce che te vos: io sei che voi min ’si doman
bonora, parceche se stago ancora ca, me capitara chel che i capita a
dute chi outre pize: i me fejara ’si a scora, e vore o no vore me tociara
inpara; e io, se ei da te ra di s-ceta, no n ei propio chera de inpara,
me piaje de pi i core drio ai pavies e ’si su par i brascioi a tira ’so ra
coes de i ouzeluche.
- Ce un stanpion che te sos! No sasto che, a fei cosci, co te saras gran
te saras un musciato e dute i te coionara?
- Taje, burto soutaruco de ra mala noes! - l a craia Pinochio.
Ma l soutaruco l aea passienza e l saea ce che l ea ra vita: inveze de
sin ae inparmal de chel che dijea chel sfaza, l a seguita zenza se
sciouda:
- E se no te piaje ’si a scora, parce no inparesto almanco un mestier,
cosci te te guadagnes un toco de pan da galanton?
- Vosto che te l dighe? - l i a respondu Pinochio, che l scomenzaa a
perde ra passienza - Intra dute i mestiere del mondo in e solo un che
me sarae propio bel fei.
- E cal saraelo, sto mestier?
- Magna, bee, dromi, me ra gode e fei come el Michelazo, da bonora
fin da dassera.
- Che te sepes - l a i dito el Soutaruco-che-parla zenza se sciouda
tanto - ci che fesc chel mestier i va a feni deboto dute su l ospedal o
in prejon.
- Tendi, croato de ra mala noes!... se me stizo dassen, te vedes ben
cemodo che ra va a feni!
- Poereto Pinochio! te me fesc propio un gran peca!...
- Parce te feje peca?...
12
