- Meneghin a Prè Lissander.
- SONETT.
Stava pocch fa col vost Sonett in man,
Pensand a quell terribel prezipizi
De l’anger in la foppa, e a l'oragan,
Ch’el pò vess de desgrazi on brutt indizi;
E girand l’œucc intorna per Milan,
Me fava s’cess quell slavaggee de vizi
Che ve fa cred pur tropp minga lontan
El giornadon tremendo del Giudizi.
Signor, tocchenn el cœur Vu ch’el podii,
E ghe sarà ai altar pussee frequenza,
E se quattarà el biott mudand vestii.
Ma i postribol... ma i beucc, ma Porta Renza,
Ma tanc scandol... fiœuj! Ah capirii,
Che del giudizi... e prest, no pomm fann senza.
