- Per la festa
- de SAN LUIS GONZAGA
- SONETT.
Gh’è Sant de tucc i stat, Sant d’ogni etaa,
Omen, donn, vergen, marter, confessor,
E. tucc, sien ost, scricciatt, sciavattin, fraa
Gh’han in Ciel el sò Santo protettor.
Chi è modell de modestia e puritaa,
Chi esemplar de astinenza e de rigor,
Quell là l’è on ver miraquel de umiltaa
E questa la va in estasi d’amor.
In somma tucc i Sant del paradis
Gh’han el sò destentiv particolar;
Ma chi ghe n’ha pussee l’è Sant Luis.
Lù fough de caritaa, lù tutt candor,
Lù spece de penitenza ai secolar,
E inscì de tucc i stat l’è el protettor.
