Stravaganz del trenta pari,
Smargiassad, bulad, caprizi,
No gh’è burla, van in pari,
Se dan man con tucc i vizi.
O Milan, set persuas
Che l’è quest incœu el tò cas?
Miss che s’abbia sott ai pee
Ona væulta i massem vecc
No se gira l’œucc indree,
No se guarda sora i tecc;
Se pår tanti inspiritaa;
No se vœur che novitaa.
Novitaa de tratt, de moud,
Novitaa in del devertiss,
Novitaa e petitt de scœud
In la fœusgia del vestiss;
E se ved i bottiatt
Cont i moster de scarlatt.
Che sciablad l’abbia tolt su
Per sto spiret malarbett
Introdutt dai sciur Monsù
El lenguagg del nost Brovett,
Vel diran fina i ficu
Che gh’han brutt el camisœu.
