Voiron, Le-Blanc, Sgiordan,
Vun nativ de Sciamberi,
Che a vedell, l’è on poo mal san,
I olter duu del Fossignì,
Brava gent, tucc duu pastor,
Arzipret e Cogitor.
No ghe manca che el cappucc
Per destingui da sti Pader:
Sien pur copia, hin però tucc
Bella copia d’on bell quader.
Lor al studi in stanza, e lor
A cantà vesper in cor.
Fraa Giusepp, fraa Michelin
Gh’han de fà sira e mattina,
Chi d’abbass a cavà el vin,
Chi in despensa e chi in cusina
A la porta vun de spess;
Tucc duu in Gesa a servì mess.
Quest gh’ha i liber de maross
Per fà i cunt a quell che spend;
L’olter l’ha i fadigh pù gross,
Chè no gh’è scirott da vend:
Hin pϝ semper tucc duu in ball,
Gh’han la cà sora i sò spall.
