El castigh l’è staa tropp giust:
E la povera mia donna
Anca lee l’ha avuu el desgust
De restà su la poltronna
Con speranza de vedeff,
Ma attaccada a on fil de reff.
Rompuu el fil, sont andaa in lecc
Motrient, pensos, pentii,
Ah! che offend on amis vecc
L’è on peccaa che fa per trii!
Hoo bell stà, bell revoltamm,
No gh’è maud de indormentamm.
Me resolvi in fin di fin
Per vede de ciappà sogn
De trà in pee quatter cossin,
E me metti in codegogn;
Ma giacchè no poss dormi,
Stoo specciand che vegna dì.
Levi su quand al Ciel pias,
E no pensi d’andà a messa
Senza prima avè fɗa pas
Con l’amis pesg che n’è in pressa:
Chè el comanda inscì el Signor
A tucc quij che è staa offensor..
