 |
Questa pagina è stata trascritta e formattata, ma deve essere riletta. | |
| - 8 - |
Istess argument
SONETT QUART.
Mœur de’ mort improvvisa, o anca a sò lecc
A la miee el marì, la mamma al tôs,
E caragna la donna, e i smani e i vôs
D’on fiœu desperaa me metten frecc.
Ma che? Passaa pocch dì vedi in d’on specc
Come quell pover omm, quell bravo spos,
Quella mamma d’on cœur inscì amoros
Hin traa despart dai sò parent pù strecc.
Ma se col fornì el bott de la campana
La memoria del mort la sfuma via,
Quasi che la fudess ona bambana,
Chi ajutarà quell’anema? Oh! rossor!
Oh vituperi di chi è ingrat con Dia,
Cont el sò sangu, coi sò benefattor!
