Ecce patent tumuli: consurgunt agmine longo
Sanguine qui patriam coram asseruere tyrannis:
Districtis gladiis, redimiti tempora lauro,
«Italiam! Italiam!» flammatis cordibus edunt.
Eja, manus juvenum, eja, ruamus ad arma, ruamus!
Nostraque tres ventis pandant vexilla colores!
Eja, omnes hostem ferroque ignique prementes
Conclament omnes patriam, qua pectora flagrant.
Excede Italia! Te jam hinc exire necesse est.
Excede italicis, excede e finibus, hostis!
Quae fuit armipotens tellus celebrata per orbem,
Haec sit, carminibus, fidibus cum flore relictis.
Brachia cum sint innumeris attrita catenis,
Attamen arma valent et nunc tractare Lignani.
Non italos humeros caedit germanica virga;
Non romana jugo pubes est nata ferendo;
Non pavet externos haec jam regina tyrannos
Servitio nimis heu, tot saecula, subdita duro!
Excede Italia! Te jam hinc exire necesse est.
Excede italicis, excede e finibus, hostis!
Extruxit nobis omnes faber italus aedes,
Sed procul hinc longe alluit Ister tecta tuorum.
Tu populans agros segetes furaris et escas,
Tu rapis et patriae natos viduasque parentes.
Alpibus Italia et duplici vult aequore cingi;
Ignivomo curru transfodimus Appenninum:
Mox italum populum medius non dividet ullus
Finis, si tricolor signum fulgebit ubique.
Excede Italia! Te jam hinc exire necesse est.
Excede italicis, excede e finibus, hostis!
