 |
Questa pagina è stata trascritta e formattata, ma deve essere riletta. | |
lo tezoro ni lo goarnimento de lor mogié ni de li figij, e per aspeitá che Moizes vegnisse. Ma elli, como quelli chi eram infiamai de mavorei, si fem incontenente quello che ge avea domandao. Alaora Arono fe amugiá tuto quello oro in um mugio e poa o lo butà inter lo fogo tuto fozo inter una fornaxa ardente, e incontenente o ne fo formao um vello d'oro cossì bem feto como ne poise esse um atro. E quando li figij d'Issael lo vim si resprendente, si dissem a Aron: "Questo è lo to Dee chi te trè de terra de Egito". E quando Aron lo vi, si fe fa um otar davanti quello vello e si disse a grande voxe: "Deman sarà la festa de lo nostro segnor Dee". E l'umdeman e se levàm la matim e offerssem lo lor offerte a lo vello como dee, e mangiàm e bevèm con grande solaci davanti a quello vello. Or stagando cossì lo povo in questo solasso, lo nostro segnor Dee disse a Moizes: "Desendi de lo monte, che lo to povo che ti traisti de Egito si am peccao e si sum tosto insij de la via che ti ge mostrasti, che elli am faito um vello de oro, lo qua adoram, e si ge am faito offerta, e si dissem: O Issael, questo e lo to Dee lo qua n'a treto de la servitudem de li Egiciem". E poa lo nostro segnor Dee disse: "E vego bem che questo e um duro povo, ma una fiá la mea ira sarà contra de lor, e si te farò segnó sorve una atra gente monto mao e pu nober de questa". Alaora Moizes se butà davanti a lo nostro segnor Dee e fe oraciom davanti a lo nostro segnor Dee e disse: "O segnor Dee, perchè voi-tu che la toa ira sea contra lo to povo, lo qua tu treisti de terra de Egito con grande faticha e vertue, do[sic] Segnó, non sea cossì asochè li Egicim[sic] non possam dí chi tu ai traito li figij d'Issael de Egito per menáli a ocí in lo dezerto, asochè elli fossem destruti fora de la lor terra, per che Segnó, e te prego che ti ge perdoni le lor peccai e arecordate, Segnor, la promissa che ti faisti a lor paire Abram, Izach, Iacob, a li que' ti zurasti che ti murtipichereisti la lor semensa, cossì como le stelle de lo cel e como l'arena de lo mar, e che a lor ti ge daresti tuta la terra de Canaam per senpermai". E quando Moizes ave faito la oraciom inver lo nostro segnor Dee o non vosse fa má a lo povo che ello avea dicto de fá, e ave piete' de lor, e faita che ave Moizes la oraciom, si deseize zu de lo monte, e aduxea le doe tore in man, le que' eram scripte e faite per overa divina. E in quelle tore era letere scripte chi dixeam li X comandamenti de lo nostro segnor Dee. E desendando Moizes zu de lo monte, Ioxue odiva la bruda che fava lo povo, e disse a Moizes: "E odo grande remó de batagia in l'oste". Respoze Moizes: "Quello che fanon 1 è remó de batagia, ni voxe de casar, ni de fuzí, anti sum voxe de cantoi chi am grande alegressa". E quando Moizes fo deseizo zu de lo monte, ello se acostà a lo povo e vi lo vello de l'oro che elli aveam faito per che elli cantavam e balavam, de che Moizes ave grande dolor e ira, e ferì de quelle doe tore de prea ch'e l'aveiva in man contra una prea de la montagna, si che le fraxelà tute li rente a la montagna. E poa o vegne a lo velo de l'oro e si lo bruzà[sic] tuto q.to e fello limar cossì como sene e povere, e poa o lo fe butá inter um fiume chi era li rente a lo monte, a[sic] poa o fe beive de quella egoa a tuti li figij d'Issael, e poa o disse a Aron: "Che te avea faito questo povo che ti ai faito peccá cossì mortamenti?" E respoze Aron: "Lo nostro segnor Dee non sea de questo fellon contra de mi, che ti cognosi bem che questo povo e ré e pi[sic] de superbia e si am morto um chi ti avei lasao comeigo. E poa e vegnem a mi e si me dissem: Fane um dee chi ne governe e chi ne gie, che noi non samo umde sea andaito questo Moizes chi ne trè de Egito, ni che de ello se sea devegnuo. E si ge dissi che tuti quelli chi am oro ni argento, si me l'adugem[sic] tuto quanto, e quando e l'avi, si lu bruzai[sic] inter lo fogo, e incontenente ne insì quello vello". E Moizes si goardà e vi che lo povo era tuto desperao perchè Aron li avea faiti despogiá per lo pocho intendimento chi era in lor. E Moizes se ne ze in la parte de l'oste e crià fortementi e disse: "Tuti quelli chi sum de la parte de lo nostro segnor Dee si se acostem a mi". E se acostà a ello tuto lo povo de Levi. E alaora Moizes ge disse: "Lo nostro segnor Dee ve comanda che voi pigie' le vostre spae in man e che voi andai per mezo
- ↑ tutto attaccato, poi aggiunto un secondo non
